Копале во двор на црква, уништиле културно наследство

Тројца скопјани заработија кривични пријави откако без одобрение копале во дворот на црквата „Св. Ѓорѓи“ во Старо Нагоричане, кој е објект од културно наследство.

Полицијата вчера околу 9 часот, на лице место ги затекнала тројцата работници од Скопје, како и геоинженерот ангажиран од скопска фирма, како вршат ископи без одобрение.

„Тие направиле шест ископини околу црквата поради наводно вршење сондажа на земјиштето и притоа користеле мотики и копачи“, велат во МВР.

Поради тоа бил извршен увид во присуство на инспектори за културно наследство од Министерство за култура и Управата за заштита на културно наследство. „Констатирано е дека црквата ’Свети Ѓорѓија’ е објект од културно наследство и природна реткост и во Централен регистар е заведена како заштитено добро.

Поради тоа за каква било интервенција на вакви објекти задолжително треба да се има конзерваторско одобрение издадено од Министерството за култура“, велат во полицијата.

Работниците се приведени и против нив е поднесена кривична пријава за „оштетување или уништување добра под привремена заштита или културно наследство или природни реткости“.(Х.Р.)