Втора ослободителна пресуда за млекарот Душко

Илиевски на суд со експертско вештачење докажал дека во неговата нива во индустрискиот дел на градот расте див коноп и дека никогаш не одгледувал дрога

Битола - Основниот суд во Битола втор пат донесе ослободителна пресуда за фармерот Душко Илиевски, неговиот брат Цане и татко им Томе за случајот со наводната марихуана во нивната нива со компири. Сепак, портпаролот на Основниот суд во Битола, судијата Милка Бизевска, демантира дека има официјално објавена пресуда за исходот од судењето за фармерот.

Илиевски на суд со експертско вештачење докажал дека во неговата нива во индустрискиот дел на градот расте див коноп и дека никогаш не одгледувал дрога. Вели, со експертиза и' докажал на министерката Гордана Јанкулоска што е марихуана, а што див коноп.

„По две години голгота, откако бев апсен од оваа нива со компири, првостепениот суд од Битола пак донесе одлука дека Душко млекарот треба да има ослободителна пресуда. За сето она што го поминав, сега докажав дека сум невин и дека ова е див коноп, кој се' уште го има во нашите ниви“, изјави Илиевски токму од сред нивата со компири каде што и оваа пролет изникнал див коноп.

Илиевски се' уште се жали дека е под притисок од власта заради учеството во протестите на фармерите по пропаѓањето на „Сведмилк“.

„Заканите од МВР не запреа, каде и да одам со моето возило ме застануваат и ме казнуваат. Само ме викаат на информативни разговори. Еве јавно ќе кажам дека сакам да се расчисти криминалот за ’Сведмилк‘ и дека нема да дозволам да ме замолчат. Оваа Влада го направи криминалот, а на крај Душко го осудија за некаква марихуана“, се пожали Илиевски, според кого дури 85 проценти од сточниот фонд во Пелагонија е сосема уништен. Илиевски од „Сведмилк“ побарува 35.000 евра за откупеното млеко. (А.Б.)