Ако лекарите одбиваат, бодовите за плати ќе ги внесува министерот

Лекарите од штипската болница, иако најавија бојкот на платата по учинок, министерот за здравство Никола Тодоров, не се откажува од новиот модел на плаќање на лекарите.

„Ако не сакаат да ги внесуваат бодовите за услугите, тоа ќе го правиме ние“, рече министерот Тодоров, по реакциите на штипските и другите лекари во државата за новата плата.

За него ако сите лекари работат исто, ќе ја зема сегашната плата и ќе нема кратење на платите, а стравувањата и реакциите, според Тодоров доаѓаат од оние лекари кои помалку работат.

Сепак, за бодовниците за услугите кои поголемиот дел од установите до денеска ги немаат направено, Тодоров попушти и даде нов рок да се довршат до 12 јули. Дотогаш лекарите ќе ги регистрираат извршените услуги, а дополнително ќе ги внесуваат бодовите.

За немањето компјутерска програма за венсување на бодовите, министерот Тодоров се насмеа и рече дека секој кој има основно ИТ познавање, ќе знае дека тоа е веб апликација која треба да се преземе од Министерството за здравство. (Ј.Ј.)