04.07.2012, 15:19 Серена ја детронизира Квитова
Американката подобра во два сета од бранителката на трофејот во четврт-финалето на Вимблдон
Женскиот турнир на Вимблдон ќе добие нова шампионка, или барем различна од минатата година, бидејќи Петра Квитова доживеа елиминација. Крајна постојка на нејзиниот пат беше четвртфиналето и во него петкратната славеничка на „Ол ингланд клаб“ Серена Вилијамс. Помладата сестра Вилијамс триумфира во два сета со 6:3, 7:5.
„Кога играте против бранителката на титулата, морате да го кренете нивото на играта. Морав да бидам сериозна. Не е лесно да се одбрани грен-слем и затоа таа даде се' од себе, мислам дека никогаш не играла подобро“, изјави Американката која успеа да запре сет-топка на Квитова, во вториот период, при 5:4 за чешката тенисерка.
Полуфинална противничка на Серена ќе биде втората на ВТА-листата, Викторија Азаренка од Белорусија, која ја надигра единствената преостаната неносителка, Тамира Пашек со 6:3, 7:6.
Во вториот меч за финалето ќе се пресметаат третата и осмата носителка, Агњешка Радванска и Анжелик Кербер. И двете имаа мачни четвртфинални задачи, а се чини, за нијанса полесно помина третата носителка совладувајќи ја Марија Кириленко со 7:5, 4:6, 7:5. Кербер, пак, беше поуспешна во Германскиот трилер со Сабине Лисицки со 6:3, 6:7 и 7:5.
Резултати, четврт-финале, жени: Азаренка (2, Белорусија) - Пашек (Австрија) 6:3, 7:6; Радванска (3, Полска) - Кириленко (17, Русија) 7:5, 4:6, 7:5; С. Вилијамс (6, САД) - Квитова (4, Чешка) 6:3, 7:5; Кербер (8, Германија) - Лисицки (15, Германија).
Осминафинале, мажи: Цонга (5, Франција) - Фиш (10, САД) 4:6, 7:6, 6:4, 6:4
|
