03.07.2012, 12:01 Македонија денеска на „поправен“ против Нов Зеланд
Македонската кошаркарска репрезентација вечерва од 20 часот го игра решавачкиот дуел за пласман во четвртфиналето на предолимпискиот турнир во Каракас
Марија Ковачева
По синоќешниот пораз против Ангола на квалификацискиот турнир за Летните олимписки игри во Лондон, најдобрите македонски кошаркари вечерва од 20 ч. во рамките на групата Д ќе се сретнат со Нов Зеланд. Станува збор за репрезентација на која офанзивата и' е главно оружје. Статистиката вели дека популарните „киви“ просечно постигнуваат 85 поени по натпревар, а поголем дел од нив ги реализираат од линијата за три поена.
„Нов Зеланд е познат по одличната игра во нападот. Сето ова нема да претставува проблем за нас бидејќи нашите момчиња располагаат со доволен квалитет за да ги совладаме. Верувам дека ќе успееме да го намалиме нивниот просек од 85 поени по натпревар. Имаме соодветна тактика, која ќе мораме да ја спроведеме“, ни изјави селекторот Марјан Лазовски пред заминувањето за САД, каде што неговите избраници одиграа два контролни дуела во Атланта со комбиниран универзитетски состав.
Добра вест е тоа што противникот во Каракас допатува без двајцата најдобри играчи - квалификациите поради повреди ќе ги пропуштат Кирк Пени и Том Аберкромби. Но, селекторот Ненад Вучиниќ, покрај стандардните Таи Вебстер и Роберт Ло, ќе може да се потпре на помладите ѕвезди Мика Вукона, Алекс Плеџер и Линдзи Таит.
За пласман во втората фаза од квалификацискиот турнир, односно четврт-финалето, Македонија ќе мора да заврши најмалку на второто место во групата Д. Во тој случај, би се сретнала со првопласираниот тим од групата Ц, во која се Русија, Доминиканска Република и Јужна Кореја.
САМАРЏИСКИ СО СИТНА ПОВРЕДА
Проблем за Стручниот штаб на „црвено-жолтите“ во Каракас: на последниот тренинг ден пред стартот на натпреварот со Ангола, Предраг Самарџиски доби повреда на скочниот зглоб. За среќа, станува збор за полесно извртување на зглобот, па центарот треба да му биде на располагање на селекторот Марјан Лазовски.
ЗА ФИБА ПОВЕЌЕ НЕ СМЕ ФИРОМ
Непосредно пред стартот на квалификацискиот турнир во Каракас, интернационалната кошаркарска федерација ФИБА изврши промена во именувањето на македонската репрезентација. На официјалната страница и во сите документи поврзани со натпреварувањата на ФИБА, Македонија повеќе не е ФИРОМ, туку се води според меѓународниот код МКД.
Распоред
денеска
Група Ц: (17,30 ч.) Кореја - Доминиканска Република
Група Д: (20 ч.) Македонија - Нов Зеланд
Група А: (23 ч.) Јордан - Порторико
Група Б: (2.30 ч.) Венецуела - Литванија
утре
Група Д: (17,30 ч.) Нов Зеланд - Ангола
Група Ц: (20 ч.) Доминиканска Република - Русија
Група Б: (23 ч.) Литванија - Нигерија
Група А: (2,30 ч.) Порторико - Грција
|
