Народна банка ќе си гради нов објект пред „Лумикс“

Засега е нејасно од каде и како ќе се влегува во новиот објект и, што е најважно како ќе се обезбеди безбеден пристап до трезорите на банката

Народна банка деновиве распиша конкурс за идејно архитектонско решение за новиот објект кој ќе го гради на плоштадот „Македонија“, на просторот на кој претходно беше предвидено да се гради црква. Новиот дом на монетарната власт ќе биде зграда висока до 40 метри, што значи дека ќе има 10 ката.

Како ќе изгледа новата висококатница во центарот на градот, од каде и како ќе се влегува и, што е најважно, како ќе се обезбеди пред се' безбеден пристап до трезорите на банката, засега останува нејасно. Дотолку повеќе што објектот ќе биде во пешачка зона. Од НБРМ велат дека токму конкурсот ќе треба да го даде изгледот на новиот објект. Исто како што и прашањето за непречен пристап до зградата и изведувањето трезор се меѓу основните барања за кои решение треба да понуди идејниот проект.

Дали на монетарците им е неопходен нов простор и зошто се впуштаа во инвестиција да го реновираат сегашниот објект доколку знаеја дека наскоро ќе градат нова зграда?

Од НБРМ велат дека подолго време планирале да обезбедат нов простор, бидејќи сегашниот објект одамна не ги задоволувал нивните потреби. Тие уште пред пет години ја побарале локацијата на некогашната Народна банка на плоштадот, но тогаш им било одговорено дека парцелата е продадена во 2004 година.

„Дел од вработените се сместени на друга локација во центарот на градот во објект во сопственост на Банката. Исто така, главната зграда на НБМ се наоѓа во комплекс во кој работат уште шест институции со кои ги дели заедничките простории, што е проблематично од аспект на фун��циите кои ги има во чувањето и дистрибуцијата на парите“, велат од НБРМ.

Од таму објаснуваат дека сегашниот објект не е реновиран, туку оти во изминатиот период биле правени само парцијални реновирања на одделни делови од ентериерот на банката и тоа, пред се', заради обезбедување нормални услови за работа и задоволување на безбедносните стандарди. Биле реновирани влезните холови околу кои работата почнала уште пред пет години, но поради разни причини завршила дури лани.

Инаку, покрај сообраќајното решение, проблем за новиот објект ќе претставува и тоа што со неговата изградба ќе се блокира погледот од Портата „Македонија“ кон „Воинот на коњ“. Поради тоа во конкурсот се бара да се обезбеди оваа визура, но само доколку тоа е возможно од аспект на статиката. Засега не е јасно и какво ќе биде фасадното решение на новата зграда, иако е логично да се претпостави дека ќе се инсистира да се вклопи со околните објекти, што значи дека може да има барокен стил. Сепак, како ќе изгледа новата зграда на Народна банка, најверојатно ќе се знае до крајот на годинава. Крајниот рок за пријавување идејни решенија е 1 октомври, по што ќе следи нивно оценување. (Б.А.)