Јорданскиот крал стравува од распад на Сирија

Доколку не успее да ја задржи контролата врз целата територија на Сирија, сирискиот претседател Башар Асад би можел да пристапи кон „План Б“ и да се обиде да формира независна држава на неговата алавитска верска заедница, изјави јорданскиот крал Абдула Втори.

- Имам чувство дека ако не може да раководи со Сирија, за него „План Б“ би било создавање алавитска енклава. Според нас, тоа би било најлошто сценарио, нагласи кралот Абдула во интервју за американската телевизија Си-Би-Ес.

Според него, спроведувањето на ваквата идеја практично би значело распад на Сирија и тогаш сите соседни држави ќе сакаат да земат дел од нејзината територија.

- Не смееме да дозволиме нешто такво. Таквиот чекор би предизвикал проблеми во целиот регион и ќе ни требаат децении за да ги надминеме, додаде јорданскиот крал.