Сарчиево подготвено за Гинисовото гравче

Во штипското село Сарчиево денеска ќе се руши гинисовиот рекорд во варење грав, a годинава во надградениот котел ќе се свари петипол тони грав

Во штипското село Сарчиево денеска ќе се руши гинисовиот рекорд во варење грав. Организаторот на Гинисовото гравче, Стојан Давчев вели дека годинава во надградениот котел ќе се свари петипол тони грав, а за приготвувањето ангажирана е екипа од девет готвачи на чело со Лупчо Гиевски од хотелот „Александар палас“.

Главниот готвач Љупчо Гиевски информира дека денеска во 12 часот ќе ги стават состојките на Гинисовото гравче, а за негова подготовка потребни се од 3.800 до 4.000 литри вода.

- Како масраф ќе имаме 1.300 килограми грав, 120 килограми кромид, 140 литри зејтин, 24 килограми сол, 14 килограми мешан зачин, 6 килограми бибер, 9 килограми црвен пипер, 50 килограми брашно, еден килограм ловоров лист, 35 китки магданос, рече Гиевски.

Гравот почнува да се вари од 12 часот, кога се ставаат сите состојки, а во 18 часот ќе има свечена литургија на која ќе чиноначалствуваат Поглаварот на МПЦ, г.г Стефан и митрополитот на Брегалничката епархија г.Иларион.

Судијата од Гинис во 18 часот и 30 минути треба да го прогласи Гинисовиот рекорд во варење грав. Давчев истакна дека годинава очекува голем број гости да присуствуваат на Гинисовото гравче, а се организира по повод 30 години од постоењето на неговата фирма „Дасто“.