Две третини од граѓаните не и' веруваат на Владата

„Еуро-барометар“: 69 проценти од македонските граѓани немаат доверба во парламентот, а 27 отсто сметаат дека економијата е добра

Според најновата анкета на „Еуро-барометар“, шеесет и седум проценти од анкетираните граѓани не и' веруваат на Владата, што е за 7 отсто повеќе од претходната анализа. Од друга страна, 30 проценти од граѓаните на Македонија и' веруваат на Владата, за разлика од претходната бројка која беше 34.

И довербата на граѓаните во парламентот е лоша. Само 31 процент од анкетираните граѓани дале потврден одговор, а дури 69 проценти дале негативен одговор.

Ниту за оптимизмот не може да се каже дека се наоаѓа на некоја висока скала иако е за десетина проценти поголем од просекот во ЕУ. Триесет и пет проценти од граѓаните изјавиле дека во следните 12 месеци политичката и економска ситуација во земјава ќе биде подобра, а 41 процент рекле дека ќе биде полошо.

На прашањето, пак, дали државата се движи во правилна насока, дури 49 проценти од анкетираните изјавиле „не“.

Од друга страна, 64 проценти од Македонците генерално се задоволни од животот што го имаат во моментов.

Според резултатите од анкетата, најнезадоволни од животот меѓу членките на ЕУ се граѓаните на Грција (68 проценти), Полјаците (66), Бугарите и Унгарците (58 проценти), Романците (51 процент). Најзадоволни, пак, се Финците (94 проценти), Данците (91 проценти), Германците (89 проценти).

Над половината од македонските граѓани (53 проценти) одговориле и дека дека се задоволни од состојбата во нивните домаќинства, што е повисок процент од десетина земји во ЕУ и држави кандидати или аспиранти за членство, меѓу кои и Грците (21), Шпанците (49), Италијанците (48), Унгарците (26), Полјаците (30), Романците (40), Хрватите (48), Турците (51), Црногорците (31), Србите (29),...

Економијата и невработеноста и натаму се двата најголеми проблеми и за жителите на ЕУ и за македонските граѓани.

Состојбата во националната економија како добра ја оцениле 27 отсто од Македонците, што е ист процент како и просекот во ЕУ. Најнезадоволни од економската состојба се Грците (100 отсто), а по нив се Шпанците (99), Португалците (97), Унгарците (93), Италијанците (92), Литванците и Летонците (86), Бугарите и Словаците (85),...

Од состојбата со вработеноста се задоволни 38 отсто од анкетираните македонски граѓани. Понегативен став за ова прашање имаат Грците (19), Унгарците (24), Романците (26), Црногорците (27), Србите (21), Бугарите (37) и Хрватите (36). (П.Р)