Конзервација на локалитетот Стибера

Стибера бил антички град со околу 20 илјади жители и својот процут го имал од третиот век пред нашата до третиот век од нашата ера

По повеќе години, првпат се врши обемна конзервација на археолошкиот локалитет Стибера кај селото Чепигово, Прилепско. За таа цел Министерството за култура одобри 2,5 милиони денари.

Според советникот-конзерватор Кире Јованоски, Министерството за култура ги одобрило сите пари кои ги побарал Прилепскиот завод и музеј за обемните зафати.

- Се конзервира или се зачувува се` што се ископуваше минатите три години во Стибера. Се конзервира гимназионот, култните објекти, а во моментов се работи на римските бедеми, објаснува Јованоски.

Стибера бил антички град со околу 20 илјади жители и својот процут го имал од третиот век пред нашата до третиот век од нашата ера. Стибера е најпознатото наоѓалиште на овие простори на мермерни статуи во природна големина. Според археолозите, досега се пронајдени 30-тина статуи, од кои дел се во Музејот на Македонија.

Конзерваторските работи во Стибера почнаа во јуни и ќе траат до октомври. Целта е локалитетот да се зачува, но и да биде што е можно поавтентично претставен пред туристите и посетителите.