03.07.2012, 21:50 Македонија се истури врз Нов Зеланд
Нашата кошаркарска репрезентација ја забележа првата победа (84:62) на олимписките квалификации во Каракас и обезбеди пласман во елиминациската фаза
Најдобрите македонски кошаркари ја забележаа првата победа на олимписките квалификации во Каракас со која осигураа место во четвртфиналето. Во вториот меч од фазата по групи Македонија го совлада Нов Зеланд со 84:62. Избраниците на Марјан Лазовски, сиот бес од стартниот пораз од Ангола го истурија во првата четвртина против Новозеланѓаните, добивајќи ја со 26:11. Противникот воспостави баланс во вториот период и ја одржа негативата на слично ниво и на одморот (44:31). Екипата од Океанија направи обид да го анулира водството и во третата четвртина се спушти на едноцифрен дефицит, минус девет. Сепак, на почетокот на завршниот период, црвено-жолтите момци направија серија од 12:0 и дојдоа до највисоки плус 25.
Победата со висока разлика значи сигурен пласман понатаму, но и шанса да се освои првото место во групата. За тоа да се оствари, во последното коло, Нов Зеланд треба да ја совлада Ангола.
На вечерашниот натпревар, Мекејлеб оствари двоен ефект со 23 поени и 11 асистенции, како и Перо Антиќ со 17 коша и 10 скока. Влијателни беа и Гечевски со 16 поени и Илиевски и Војдан Стојановски со по девет. (В.А.)
|
