04.07.2012, 15:06 Охридско лето не смее да биде заложник на какви било условувања
Директорката на фестивалот Елизабета Јанкуловска одржа прес по најавите за можен штрајк од синдикатите на Македонската опера и балет и на Македонската филхармонија
Никој не е поголем од фестивалот и неговото значење и затоа не смее да се дозволи „Охридско лето“ да биде заложник на какви било условувања, рече денеска на прес-конференција директорката на фестивалот Елизабета Јанкуловска по најавите за можен штрајк од синдикатите на Македонската опера и балет и на Македонската филхармонија кои се незадоволни од понудените услови за сместување во Охрид за настапите на 12-ти и на 19 јули.
- На сите учесници на фестивалот „Охридско лето“, независно дали се домашни или гости од странство, им се понудени еднакви услови и третман, достоен на реномето на манифестацијата, рече таа и додаде дека понудите за учество на членовите на двете национални установи биле уредно доставени до нивните директори уште во април годинава.
Биле понудени две опции - хотелско сместување со полн пансион и вклучени патни трошоци (меѓуградски и локален) или втората опција - надомест од 2.000 денари на ден. Двете институции му одговориле на „Охридско лето“ дека уметниците ја прифатиле втората опција, на која реагираа синдикатите на музичарите.
- Зачудува фактот што во годината кога се понудени најдобрите услови за учество на манифестацијата „Охридско лето“, на само неколку дена пред почетокот, се случуваат вакви настани кои само фрлаат дамка врз свеченото отворање, рече Јанкуловска.
Смета дека обезбедените 8.000 денари за четири дена во Охрид за учесниците од МОБ и 4.000 илјади за два дена престој за членовите на Македонската филхармонија покрај нивната редовна плата се соодветен третман на македонските уметници.
- На забелешките во врска со превозот, информираме дека во понудата која опфаќаше пансионско сместување во хотелите, избрана според тендер, и која вработените во МОБ и МФ ја одбија, многу јасно беше наведено дека е обезбеден превоз со климатизиран автобус, транспорт за опремата и локален превоз од хотелот до сцените каде што ќе се одвиваат подготовките и концертот, нагласи директорката на фестивалот.
Јанкуловска додаде дека се е преземено за непречено и свечено да биде отворен 52-риот фестивал. - Подготовките се при крај и нашето внимание е сконцентрирано кон уште едно спектакуларно отворање, рече таа. Фестивалската управа, додаде, најпрофесионално се труди во подготвувањето и реализацијата на фестивалот и за соодветен третман на сите учесници, без оглед дали се домашни или странски.
|
