Стевчо Јакимовски доби европски „Оскар“ за најдобар градоначалник

Во Сараево градоначалникот на Карпош ја прими наградата за најуспешен во Југоисточна и Средна Европа

Од нашиот известувач
Деспина Трајковска


Сараево - Градоначалникот на Карпош, Стевчо Јакимовски и официјално е прогласен за најдобар градоначалник во Југоисточна и Средна Европа. Ова признание завчера во Сараево на свечена церемонија му го врачија од босанската Агенција за избор на најменаџери за Југоисточна и Средна Европа, со седиште во Зеница. Оваа Агенција годинава по 26. пат направи избор на над дваесетина најуспешни менаџери од областа на економијата, а додели и десетина специјални признанија, награди за животно дело и направи избор на личност на годината. Според Пане Скрбиќ, претседател на организацискиот одбор на Агенцијата, наградите претставуваат пандан на филмскиот „Оскар“, во случајов во сферата на бизнисот, политиката, спортот, културата...

„Оваа награда ја сметам како признание на континуитетот на мојата, но и на работата на администрацијата на Карпош и општинскиот Совет, како и на моите претходници. Ова е доказ и дека не само граѓаните на Карпош и на Скопје ги препознаваат успесите на Општината, туку и луѓето надвор од нашата држава“, истакна Јакимовски на доделувањето на наградите.

Со работата и успехот на Карпош присутните на церемонијата беа запознати и преку десетминутен спот, по кој многумина бизнисмени речиси и не го дочекаа крајот на свечениот настан сакајќи да се информираат за можностите за инвестирање во оваа скопска општина.

Дека наградата има „тежина“ и очигледно претставува предизвик да се вброи во „сивито“ на кариеристите, доказ беше посетеноста на церемонијата, големината на присутните гости и нивото на организацијата. Свечената сала во сараевски „Холидеј ин“ беше претесна да ги прими сите поканети, меѓу нив и наградениот црногорски претседател Филип Вујановиќ, дипломатскиот кор во Босна и Херцеговина, градоначалникот на Сараево и бизнис елитата не само од БиХ, туку од целиот регион.

Од Агенцијата најавија дека интересот за завчерашниот настан кој се одржа во Сараево по 15. пат, од вкупно 26 организирани доделувања, ќе им претставува поттик во иднина тоа да се прошири и во другите сфери од живеењето. „Од година во година се докажува дека нашата награда е своевидна круна за кариерата на наградените, или, пак мотив за продолжување и достигнување на уште поуспешни резултати на номинираните и наградените“, истакна Томислав Антуновиќ, претседател на жирито.

Инаку, Јакимовски е прв македонски градоначалник кој го добива ова високо признание. Од регионот негови носители се градоначалникот на Љубљана, Зоран Јанковиќ, на Загреб, Милан Бандиќ, Алија Бехмен од Сараево и Миодраг Мугоша од Подгорица.

Јакимовски присуствуваше и на Меѓународната деловна конференција која годинава беше на тема „Регионална стопанска соработка и развој“. Од лично искуство, како што рече, политичарите се тие кои можат да ги подобрат или влошат условите за бизнис-клима.

„Она што политичарите можат да го сторат за бизнис-секторот е да креираат поволна бизнис-клима и стабилно законодавство кое нема да се менува секој месец, да водат сметка дали има физичка сигурност за бизнисмените, дали судството е независно, дали има ефикасна администрација.Токму тоа е и улогата на локалната самоуправа, да обезбеди стручна и ефикасна администрација која знае да го препознае успешниот бизнис, на своја територија да обезбеди соодветна инфраструктура за него, максимално да ги скрати процедурите за издавање дозволи, а се' во насока на олеснување на инвеститорите“, истакна Јакимовски на Конференцијата на која своето искуство го пренесе и Тихмор Имиќ, претседател на Меѓународниот форум за обновливи извори на енергија и директор на „Електровојводина“ од Нови Сад. На конференцијата говореа и Тони Мегле, сопственик и генерален директор на „Мегле“ од Германија, Исток Селјак, претседател на конзорциумот „Феникс и Хидриа“ од Словенија и други.

Наградени и Вујановиќ, Кацин, Мегле, Тара…

Дирекцијата годинава додели триесетина награди и признанија, од нив 20 за менаџери на годината, а додели и неколку специјални признанија и награди за животно дело. Како пандан на филмскиот Оскар, годинава додели и специјална награда - личност на годината. Престижното признание го понесе црногорскиот претседател Филип Вујановиќ. Признанието му беше доделено за, како што истакнаа од жирито, новите визии за регионот, енергијата со која ја врши функцијата, почитта спрема соседните држави, а пред се', бидејќи во соработката со другите земји предност дава на развојот и соработката на економијата, а дури потоа на политиката.

Меѓу специјално наградените беа: Јелко Кацин, Тони Мегле, турскиот бизнисмен Сарик Тара…