И конфискацијата на имотот алатка за политичка пресметка

Експремиерот Бучковски е убеден дека политичкиот отстрел ќе им се удри од глава на портокаловите богаташи

Оливера Војновска

Дали воведувањето законска можност за проширена конфискација на имотот ќе отвори нов фронт за пресметка со политичките неистомисленици? Експремиерот, професор на Правниот факултет, Владо Бучковски, е убеден дека токму тоа ќе се случува во државата. А за година-две како бумеранг ќе им се удри од глава на новите портокалови богаташи.

Бучковски последните измени на Кривичниот законик ги оквалификува како лош експеримент, притоа изразувајќи се сликовито низ два примера покажа што може да се случува во иднина. „Измените на Законот ги носите на мускули. Со ваква алатка која било власт може да се пресметува со политичките неистомисленици. Вам ќе ви се удрат од глава за година-две, кога овие мерки ќе се применуваат на портокаловата буржоазија. Доволно е да се покаже со прст дека некој е несразмерно богат. Некој од нашите портпароли ќе застане пред куќата на некој од новата портокалова буржоазија, како Влатко Ѓорчев кога имаше опавче, и ќе бара да му се конфискува имотот. Некој, пак, ќе праша како може студентот по право од вториот ред за три години пратенички мандат, да вози ’мерцедес‘ вреден 40 илјади евра“, гласно размислуваше Бучковски, алудирајќи на пратеникот од ВМРО-ДПМНЕ, Илија Димовски, иако не го спомна директно. Нагласувајќи дека целата експертска јавност е против ова решение, тој рече дека овој експеримент се прави врз инсистирање на поранешната советничка на премиерот, Моника Маковеј. Тој предупреди дека имотот не може да се одзема без правосилна судска пресуда за сторено кривично дело. „Маневски се прави голем реформатор. Но, тука се прави повреда на основното уставно начело за заштита на приватната сопственост. Ние отвораме лов на вештерки. Сега кога сте на власт треба да мислите за тогаш кога ќе бидете во опозиција“, им препорача Бучковски на колегите од ВМРО-ДПМНЕ. Заклучувајќи дека со драконски мерки се урива правниот систем направи паралела со Северна Кореја.

И шефицата на пратеничката група на СДСМ, Цветанка Иванова, предупреди дека ова е најпроблематично решение во Законот. Таа смета дека не е доволно јасно прецизирано како ќе се конфискува имотот на сторители на кривични дела, здобиен од тие дела. „Оваа нова мерка е недефинирана, нејасна и со неа може да се одземе имот и на негови најблиски лица. Дури може и да се замрзне имот, ако има само основа за сомневање за кривично дело“, вели Иванова.

Координаторот на пратеничката група на ВМРО-ДПМНЕ, Силвана Бонева, не разбира зошто се стравувањата дека оваа одредба е насочена кон политичките противници. „Не знам зошто се препознавте во овој член. Тој предвидува да се конфискува имот од трети лица и од членови на семејствата, но имот од сторител на тешки кривични дела. Досега имаше сторители што имотот го пренесуваат на нивните членови, на потесното или на поширокото семејство, на нивни пријатели... Тоа беше основ за изигрување на законите“, нагласи Бонева.

Забелешките на СДСМ не беа прифатени и по завршувањето на расправата Собранието со 56 гласови „за“, на пратениците од владејачкото мнозинство и шест „против“, на опозицијата, ги усвои спомнатите корекции во Кривичниот законик. Бучковски изрази жалење што и за овие измени нема консензус, како што беше случај со измените на Законот за државни службеници, кои парламентот претходно ги изгласа. Ова е последниот од пакетот четири закони (законите за Собрание, за внатрешни работи и за финансирање на политичките партии), што се услов за добивање позитивен извештај од Европската комисија и препорака за почеток на преговорите со ЕУ.

Собранието вчера со консензус ги усвои и измените на Законот за судир на интереси, за кој даде поддршка и опозицијата. (О.В.)