Борисов се коригираше за Македонија

Бугарија, според Борисов, е еден од најдобрите пријатели на нашата држава

Од нашиот дописник
Слободанка Јовановска

Брисел - Бугарскиот премиер Бојко Борисов вчера се коригираше околу оцените за несреќата во Охрид, која според најновата квалификација не била резултат на безобразност, туку на немарливост. Сакајќи очигледно да ја поправи штетата од недипломатската изјава, Борисов отиде и подалеку тврдејќи дека Бугарија е еден од најдобрите пријатели на Македонија и оти со премиерот Никола Груевски нема лоши, туку прекрасни односи.

„Имаме прекрасни односи со вашиот премиер, а и вашиот министер за надворешни работи, заедно со нашата министерка, беше на погребот и панахидата во Бугарија. Причината што 15 бугарски граѓани загинаа во Охрид е од немарливост - тоа е точниот збор - и тоа не можам да го скријам. Се надевам дека не ве навредив со тие зборови“, изјави Борисов на прес-конференција во Брисел.

За да ја потврди добронамерноста да ги унапредува односите со нашата земја, место впечатокот кај нас дека ќе ги влошува, Борисов напомна дека како градоначалник веќе бил во посета на Македонија и се надева оти сега како премиер ќе размени мислења со нашиот премиер. „Сакам да ве уверам дека ние сме едни од најдобрите пријатели на Македонија. Ве молам да верувате во тоа“, апелираше тој, практично демантирајќи ги сите очекувања дека и неговата Влада, како и претходната, ќе фати остар курс кон Македонија во ЕУ и ќе ја запира во евроинтеграцијата.

„Да беше обратно, да загинеа 15 Македонци во Бугарија, вие ќе бевте поостри од мене. Но, ја користам пригодата да им изразам благодарност на претседателот, на премиерот и на сите што учествуваа, што успеавме да ги вратиме назад живите и мртвите во Бугарија“, порача Борисов.

Инаку, Борисов доаѓа од истата политичка групација на премиерот Никола Груевски, групата на народните партии, па вообичаено е таквите влади да имаат подобри односи отколку кога би биле спротивни политички ориентации. Неговата посета на Брисел, сепак, беше мотивирана од настојувањата да го смени тонот на ЕУ кон Бугарија, но не со празни ветувања, туку со конкретни мерки, со кои ќе докаже дека како премиер е решен да стави ред во државата и да ја расчисти корупцијата. Неговиот имиџ во Бугарија е дека како политичар не ги решава проблемите, туку ги сече во корен, а таа проекција сака да ја пренесе и во Брисел, со вчерашните уверувања дека „секое ЕУ-евро испратено во Бугарија ќе биде заштитено од злоупотреба и гарантирано“.

Неговата одлука да ги замрзне пензиите, платите на администрацијата, скапите владини инвестициони про��кти и поревносно да ги сервисира долговите, му го зголемија уште повеќе рејтингот во земјата. Фигуративно кажано, Борисов сака неговата политичка ѕвезда да засвети не само во Бугарија, туку и во ЕУ, бидејќи , како што рече, таа не заслужува и натаму да се посочува како најсиромашна и најкорумпирана во Унијата.