Перо Давидовски упадна во куќата на вдовицата на Тито

Српските власти воопшто не ги известиле македонските колеги дека уапсиле македонски државјанин поради упад во куќата на вдовицата на Тито, Јованка Броз. Ниту нашата амбасада во Белград, ниту министерствата за надворешни и за внатрешни работи во Скопје не добиле известување за приведувањето на скопјанецот Перо Давидовски (43), кому во српскиот Окружен суд му била изречена екстрадиција.

Поради тоа, нема ниту официјална потврда кој е „вистинскиот“ Перо Давидовски од Скопје, кој во вторникот, околу 11 часот, ја прескокна оградата од куќата во белградската улица „Кнез Александар Караѓорѓевиќ“, во која живее Јованка Броз. Во македонската полиција велат дека во нивната евиденција фигурираат три лица, кои имаат име и презиме Перо Давидовски, а се на возраст од 43 години!

Неофицијално се зборува дека „нашиот Перо“ живее со своите родители, не е женет, завршил само основно образование, а своевремено работел како шофер во една амбасада во Скопје. Овој Перо веќе бил обвинуван за провала, фалсификување пасош и за прекршоци во сообраќајот.

Како што е познато, Давидовски упаднал во дворот од куќата на сопругата на починатиот југословенски претседател Јосип Броз за да добие позитивна енергија од „мајка си Јованка“, имајќи предвид оти тврдел дека им е син на Јованка и Тито.

„Како мал бев однесен во Скопје, а сега кога сум возрасен, дојдов да ја видам мајка ми“, тврдел Давидовски пред српските полицајци. Но, не наишол на разбирање кај српските власти, кои му одредија едногодишна забрана за влез во Србија, како и одлука за екстрадиција во Македонија.

Српскиот министер за труд и социјални работи, Расим Љаиќ, соопшти дека станува збор за психички нестабилна личност. Јованка Броз изјавила дека не е потресена, бидејќи е навикната да ја вознемируваат непознати луѓе. (Г.А.)