Зоврива собраната „кратошија“, зовриваат и лозарите

Грозје не купува никој дури и за седум денари килограм. Ќе се блокираат сите винарски визби ако цените не се вратат на ланско ниво

Ангел Данов

КАВАДАРЦИ - Лозарите се на нозе по шокантните вести дека цената за килограм „кратошија“ со 19 шеќерни единици е падната на само седум денари за килограм, но и покрај тоа никој не откупува грозје. Колони со неколку десетици натоварени трактори четири дена чекаат откуп во село Сопот. Грозјето веќе почнало да ферментира во приколките. Лозарите се очајни. Ги повикаа премиерот Никола Груевски и претседателот на државата, Ѓорге Иванов, да дојдат и да се запознаат со нивната мака.

И „Агротиквешија“ се размрда. Вчера ги почна подготовките за генерален штрајк кој го закажа за утре. Ќе се блокираат сите винарски визби во земјава ако на денешната средба во Владата помеѓу лозарите и винарите не биде постигната согласност за враќање на цените на ланско ниво. Пред почетокот на бербата, „Агротиквешија“ побара 19 денари за килограм „вранец-кратошија“. Според нив, тоа е цената која би можела да ги покрие трошоците, но и да остане некој денар за производителите.

Зад лозарите застанаа и од Федерацијата на фармери. „Покрај сите повикувања на пазарна економија, ова е надвор од разумот. Цените се намалени како никогаш досега во историјата на лозарството. Ова ќе го уништи лозарството, како што беше случајот со млекарството“, рече Ѓоко Данаилов, претседател на ФФМ.

Лозарите побараа локалната власт и пратеникот од тоа подрачје активно да се вклучат во решавањето на проблемот на лозарите. Педесетина лозари вчера беа примени од претседателот на кавадаречкиот Совет, Илија Тренчев, кој потенцира дека никој не очекувал ваков низок удар со откупните цени.

„Неприфатливо е во екот на бербата да се симнува цената на грозјето и да се манипулира со лозарите“, истакна Тренчев. Тој најави дека најдоцна до сабота ќе има продолжение на шестата седница на која Советот на Кавадарци ќе расправа за актуелната состојба со откупот на винското грозје.

Лозарите бараат премиерот и министрите да дојдат во Кавадарци наместо нивни претставници да одат на состаноци во Владата. Спонтано почнаа лозарите да се собираат и пред винарската визба „Тиквеш“, каде што со очај и неверување гледаа во огласната табла на која беа истакнати откупните цени, но и известување дека од понеделник, 14 септември, немало да се прават нови договори за откуп на „вранец“. Количините што ќе ги откупи „Тиквеш“ се ограничени и нема да ја откупиме вкупната количина „вранец“, стои понатаму во известувањето.

„Срамота и грев е ова што го прав��т винарските визби. Четири дена сум на откупниот пункт. Рекоа да береме грозје. Тоа го направивме, а сега родот почна да ферментира во приколката. Цената е спуштена на седум денари и пак не сакаат да го откупат“, со солзи во очите вели Душан Спиров, лозар од Кавадарци.

„Премиерот и претседателот, наместо да седат во кабинети, треба да бидат меѓу својот народ, кој сега има проблеми“, нагласи Миле Андреев од село Сопот, кој четири дена е во колоната со трактори и чека некој да се смилува и да го купи грозјето.

Љупчо Стефанов, лозар од кавадаречкото село Марена, со секира се упати кон својот лозов насад, бидејќи, како што рече, неподносливо било ова што му го правеле на лозарите и од државата и од визбите.

„Срцето ме боли. Со години сум инвестирал. Сум вадел и од ноктите, сум крател и од лебот на мојата фамилија, само да подигнам насад од 10 декари. Сега се шегуваат со нас. За што дава Владата субвенции? За нови насади? Не можеме да го продадеме грозјето од постојните насади и тоа за цена која е далеку од секој здрав разум. Имам деца-студенти, како да ги продолжат студиите. Работам за 6.000 денари месечно. Од грозјето ја хранам мојата фамилија“, видно потресен од актуелната состојба Стефанов ја крена секирата и почна да го уништува својот насад.

Претседателот на „Агротиквешија“, Љупчо Аризанов, смета дека „Тиквеш“ е винарска визба која врши погреб на лозарството во Тиквешијата и, воопшто, во земјава, а нивната политика како диктат ја следеле и останатите винарски визби. Тој ги повика сите лозари во земјава в сабота да излезат со својата механизација и да ги блокираат винарските визби, а сопствениците на „Тиквеш“ ги посоветува да заминат од Кавадарци. Лозарите вршеа притисок врз Аризанов одлуката за штрајк да стапи во сила веднаш и да нема одложување, бидејќи со денешната средба власта сакала да купува само време.

„Грозјето не чека средби и договарања. Мора веднаш да излеземе на штрајк. Состанувањата се на наша штета. Нас политика и партии не не' интересираат. Наша партија и наша политика е грозјето“, обвинуваат револтираните лозари.

Од винарската визба „Тиквеш“ информираа дека грозјето од сортата „вранец-кратошија“ со 21 шеќерна единица е над девет денари килограм, а за она со шеќерност 25 се плаќа 14 денари. „Понудивме седум денари и за грозјето со 19 шеќерни единици. Доколку има некој грозје со толку слаб квалитет, сепак, да може да го продаде“, велат извори од „Тиквеш“. (А.Д.)