Поглед

Политика во дворови

БилЈана Јовановска

„Не е лошо да има политика и во образованието, но проблем е кога таа таму се води на ниво на училишни дворови“.

За оние што не го слушнале - автор и на овој политички бисер е новопечениот министер за образование, Никола Тодоров. Во политиката е многу кусо, ама без малку со секое појавување во медиумите, остава свој белег. Се прослави и заслужува да биде застапен во книгите од типот „Верувале или не“. Значи, за министерот проблем е само ако политиката во училиштата се води на ниско ниво. На ниво на дворови. Ако доаѓа од владини кабинети, таа е добредојдена! Супер, така се оди напред. Затоа и не мрдна со прст да ги запре самоволните градоначалници, кои деновиве на 1.000 наставници им поделија отказни решенија само затоа што некој оценил дека се партиски неподобни.

За апсурдот да биде поголем младиот владин функционер ова го изјави токму кога потпишуваше документ со кој се бара спротивното. На Декларацијата за деполитизација на образованието, мултиетничката толеранција и ненасилната комуникација министерот Тодоров стави потпис заедно со невладиниот сектор.

А деновиве, политиката не да е присутна, туку го преплави образованието. По инструкции од „важни луѓе“ од ВМРО-ДПМНЕ, во сите општини во Македонија проработе партиската метла. Отказни решенија заработија сите што не покажале лојалност кон власта. Зошто? Па, мораше да се наградат партиските војници што ги заменија наставниците со искуство од една до пет години. Тоа што меѓу нив има и со неположен стручен испит, не е пречка. Избрканите наставници нема кој да ги заштити, бидејќи СОНК сега не е заинтересиран за бранувања и во училиштата буквално се' е можно.