Груевски нуди „кинески кварт“ во економските зони

Доколку постои интерес, Владата е подготвена да креира зона каде што ќе дојдат повеќе кинески компании

ДалиЈан - Претседателот на македонската Влада, Никола Груевски, вчера во Далијан се сретна со кинескиот премиер, Ван Џијабао, со кого разговараше за повеќе аспекти од соработката меѓу двете земји.

Груевски му се заблагодари на Џијабао за поддршката што Кина и' ја дава на Македонија на повеќе полиња и изрази подготвеност кинеските компании да дојдат и да инвестираат во Македонија. Тој ги повтори условите што ги има за инвестирање во Македонија, особено во слободните економски зони каде што, во согласност со сегашните измени на законот, данокот на добивка и персоналниот данок на доход во првите десет години не се плаќаат, а по десет години се плаќа само десет проценти, што е многу ниска стапка во споредба со она што се плаќа во другите држави.

„Дури посочив, доколку постои интерес, дека сме подготвени да креираме и една зона каде што ќе може да дојдат повеќе кинески компании доколку сознаат дека Македонија може да биде добра база за настап на европскиот пазар, имајќи предвид дека Македонија има договор за слободна трговија со Европската унија, дека е земја-кандидат и има договори за слободна трговија со земји надвор од Европската унија, како што се Украина, Турција, Албанија, поранешните југословенски држави и уште неколку други, вклучувајќи ги и Швајцарија и Норвешка“, изјави македонскиот премиер по средбата со Џијабао.

Груевски го информира кинескиот премиер дека во Македонија има поголем број енергетски проекти, кои се во завршна фаза на подготовка и наскоро ќе излезат на јавен повик, напомнувајќи дека кинеските компании и во овој сектор можат да најдат интерес. Тој, исто така, спомна дека наскоро една кинеска голема компанија планира во нашата земја да почне изградба на фабрика за производство на компјутери и монитори, што е одличен старт за соработка и за односите меѓу двете земји.

Груевски на средбата, исто така, го отвори и прашањето за договор во областа на туризмот, што наскоро треба да се потпише, со цел да се овозможи размена на туристи. Кинеските компании од својата влада треба да добијат соодветни лиценци за да можат да носат туристи во Македонија, што може да биде значаен прилив и поддршка за нашите туристички амбиции и капацитети.

На средбата е разговарано и за политичките односи, за развојот на нашите политички амбиции, при што Груевски уште еднаш повтори дека Република Македонија ги исполни сите реформи за членство во НАТО и оти сме на прагот на исполнување на сите последни критериуми за да добиеме датум за почеток на преговори за членство во ЕУ. Тој, исто така, и' се заблагодари на Кина за принципиелниот однос уште од почетокот на нашата независност за признавањето под уставно име, ја реафирмира положбата на македонските власти за една Кина и рече дека иако моментно сме блокирани за НАТО, сепак, се бараат начини за излез од таа ситуација, се разговара со Грција и изрази надеж дека во иднина ќе се најде некое решение со кое ќе се надмине овој проблем.

Премиерот Груевски вчера во Далијан имаше средби и со функционери од Виетнам, Сингапур и Украина, а попладнето присуствуваше на отворањето на Состанокот на новите шампиони на Светскиот економски форум, кој ќе трае до 12 септември.

Годишниот состанок на Светскиот економски форум, уште се нарекува и „Летен Давос“ во Азија, е посветен на повторно поттикнување на економскиот раст и на него ќе присуствуваат повеќе од 1.300 учесници од 86 земји. (МИА)