Еврото скапо ги чини Европејците

Чешкиот претседател Вацлав Клаус, кој долго не го крие својот скептицизам кон проектот за единствената европска валута смета дека еврозоната и еврото ќе ги преживеат тековните проблеми, но, според него, европските земји тоа ќе ги чини забавување на економскиот раст и пораст на финансиските трансфери што ќе треба да им се испраќаат како помош на земјите со проблеми во економијата. „Еврото ќе продолжи да постои, но за исклучително висока цена што ќе ја платат граѓаните на земјите на еврозоната, а посредно и некои други Европејци, вклучувајќи ги и оние што дома не плаќаат во евра. Цената ќе биде долгорочниот застој на економскиот раст што ќе се евидентира со економски загуби во нашиот потенцијал и во развојот на другите земји во светот“, пишува Клаус во најновото издание на чешкиот неделник „Економ“.

Според Клаус, единствена причина за непропаѓање на еврозоната како институција е во тоа што во проектот на еврото е инвестирано премногу политички капитал. Чешкиот претседател смета дека единствената валута не им го донесе на нејзините поборници очекуваниот ефект и нејзиното одржување сега и за нив станува поскапо. (МИА)