Уште најмалку пет години нема подобар живот за Македонците

Низок раст на економијата за земјава проектира ММФ се' до 2015 година, а експертите велат дека со ваков раст нема подобар стандард

Соња Маџовска

Последните прогнози на Меѓународниот монетарен фонд говорат дека македонските граѓани и во наредните пет години нема да имаат повисок стандард. Низок раст на економијата за земјава проектира ММФ се' до 2015 година. Па, така, за годинава се предвидува растот на македонската економија да биде два отсто, за 2011 година да изнесува три проценти и во 2015 година се прогнозира да биде четири отсто.

Тоа значи дека македонските граѓани нема да имаат повисоки плати и повеќе вработувања. Според аналитичарите, една земја треба да има одржлив економски раст најмалку од шест до осум отсто неколку години за да го почувствуваат тоа и граѓаните.

Раст помалку од шест отсто не носи подобар стандард, вели професорот Абдулменаф Беџети. „Би биле среќни доколку не се влошува стандардот на македонските граѓани. Со овие стапки на економски раст не може да се очекува подобар живот за граѓаните. А ако се додадат и другите аспекти, како што се политичките, демократските и социјалните фактори, може да биде и полошо. Нема поместувања во приближувањето на Македонија кон Европската унија и кон НАТО, а тоа е услов економијата да тргне напред. Врз основа на околностите не може да се очекува економски раст што би генерирал и подобар живот. Секоја стапка на раст помалку од шест отсто не дава ефекти, односно мала стапка на раст не мултиплицира развој“, вели Беџети.

Опозицијата смета дека земјава е заглавена од сите страни, политички и економски, никако не се поместува од мртва точка. „Мислам дека предвидувањата за годинава, дека економскиот раст ќе биде два отсто, се амбициозна процена. Веројатноста е голема таа стапка да не биде остварена. Последните прогнози на ММФ за македонскиот раст до 2015 година покажуваат дека ќе имаме стагнација. Македонија е заглавена и политички и стратегиски. Земјава не се наоѓа ниту на колосекот на ЕУ, ниту на НАТО, ниту на странските директни инвеститори, па затоа ќе останеме таму каде што сме. Со овие политики на подолг рок нема подобар живот за македонските граѓани“, вели потпретседателот на СДСМ, Зоран Јовановски.

Тој најави дека на претстојните разговори со ММФ ќе го отворат прашањето за минатогодишната стапка на раст. „Претстојната мисија на ММФ е многу важна за да се разјаснат многу прашања. На пример, како што се случи во последните два месеца од 2009 година, за македонската економија, макар и статистички, да излезе од рецесија. Минатата година падот на БДП беше 0,7 отсто, а во декември лани ММФ прогнозираше дека тој ќе биде 1,3 отсто. Што се случи за падот да биде многу помал. Како е можно да има толкава разлика“, вели Јовановски.

Во најновиот извештај за состојбата на светската економија ММФ оцени дека глобалната економија закрепнува од рецесијата побрзо отколку што се очекуваше, но оти итните мерки за спасување ја влошиле состојбата на јавните финансии, така што земјите се подложни на нови кризи. Прогнозата и натаму е невообичаено несигурна, соопшти ММФ, додавајќи дека ризиците се движат кон пад и оти најмногу загриженост предизвикува можноста за зголемување на јавните долгови.

Сепак, ММФ излезе со пооптимистичка прогноза за растот на светската економија за оваа година. Фондот ја зголеми прогнозата за 0,3 отсто и предвидуваат растот на светската економија да достигне 4,2 отсто. Во 2011 година се очекува благо забрзување на растот до 4,3 проценти. За Источна Европа се прогнозира раст од 2,8 отсто, меѓу кои најголема стапка се очекува да оствари Турција од 5,2 проценти, а најголем пад Летонија од четири отсто. Азија е лидер во заздравувањето, а САД ќе закрепнуваат подобро од Европа и од Јапонија. Кинеската економија ќе расте најбрзо, за 10 отсто во оваа година и 9,9 отсто во следната година, а силен раст се предвидува и во Бразил, Индија и во Индонезија.