Червар ќе го продолжи договорот со Металург?

Клубот од Автокоманда сака да го задржи трофејниот тренер уште една година

Миодраг Мицковиќ

Иако есенското првенство во супер ракометната лига на Македонија играчите на Металург се уште тренираат по мошне успешната сезона. По двете убедливи победи против Вардар Про практично ја одбранија минатогодишната титула и сега сите нивни мисли се насочени кон двете средби во осминафиналето на Купот на ЕХФ против една од најдобрите германски екипи Гепинген. Како што е познато првиот натпревар ќе го одиграат на 19 февруари во гости а реваншот е на 26 февруари во Скопје, најверојатно во салата „Борис Трајковски“.

Играчите на Металург ќе тренираат се до 24 декември кога ќе заминат на заслужен одмор кој е планиран до 10 јануари. Меѓутоа, на тренинзите не се комплетни тренираат што се вели двајца без тројца бидејќи вкупно 12 ракометари се повикани во репрезентативната селекција за пријателската средба со Египет која ќе се одигра во текот на неделава во Скопје. Утре на првата прозивка на селекторот Шундовски ќе треба да се појават Ангелов, Митревски, Алушовски, Манасков, Наумче и Златко Мојсоски, Георгиевски, Димовски, Левов, Миркуловски, Стоилов, Маркоски и Лазаров, практично целиот тим на Металург.

Од канцеларијата на клубот дознавме дека Металург сериозно размислува да ја засили екипата со двајца квалитетни ракометари, најмногу со десен бек и силен шутер кој и недостасува на екипата. Во тек се преговори со двајца мошне квалитетни ракометари од странство но засега нивните имиња се држат во тајност се до завршувањето на преговорите. Во клубот се шушка дека Металург доколку успее да ангажира посакувани засилувања ќе им даде зелено светло на Миљак, Шмигиќ и Лазаров за да можат да си заминат. Неизвесна е и ситуацијата со Ќурувија, кој се уште ги чувствува последиците од повредата и не може да го даде својот максимум.

Неофицијално дознаваме дека главниот спонзор на Металург, бизнисменот Минчо Јорданов, сака да го продолжи сегашниот двегодишен договор со тренерот Лино Червар од чија работа се многу задоволни во клубот барем за уште една година. Разговорите се во тек а се ќе биде познато на почетокот на идната година. Лино Червар требаше вчера да замине за Загреб на големата прослава на јубилејот на ракометната федерација на Хрватска но поради густата магла на скопскиот аеродром тој не успеа да замине, но најверојатно тоа ќе го направи во текот на денешниот ден доколку временските услови тоа го дозволат. Червар во Загреб треба да прими златна плакета за своите заслуги за ракометниот спорт во Хрватска од Федерцијата на оваа држава.