Ракометарките преку Шпанија до Бразил

Македонија домаќин на четвртата селекција во светот во реваншот од баражот за СП 2011

Роберт Димитриевски

Шпанија е последниот филтер за женската ракометна репрезентација на Македонија на патот до 20. Светско првенство што ќе се одржи во Бразил во декември 2011 година. Вицешампионот од ЕП 2008 во Македонија и четвртопласирана селекција на минатогодишното СП во Кина ќе биде домаќин на првиот натпревар од мундијалскиот бараж на 3/4 јуни, а реваншот ќе се одигра една седмица подоцна во Скопје.

„Ждрепката не е лоша. Шпанија ми беше четврти пик и воопшто не ги ни погледнав нивните мечеви на ЕП. Бев убеден дека ќе ни падне Украина, Холандија или Унгарија и токму нив ги анализирав“, е првата реакција на селекторот Гино Стрезовски. „Мислам дека имаме солидни шанси. Посебно ако Портјанко реши да го одигра и баражот. По Божик ќе го објавам планот на подготовките, кој ќе ги опфати неделите на ЕХФ и повеќе контролни средби“.

Шпанките го освоија 11. место на Европското првенство во Данска и во Норвешка што заврши синоќа. Таму избраничките на Хорхе Дуењас не беа ни приближно на нивото од двете претходни големи натпреварувања, на кои пријатно изненадија и со играта и со пласманот. Во прелиминарната фаза во Олборг ја совладаа Србија со 26:23, а загубија од Романија со 30:26 и од Данска со 22:19. Во групата од вториот круг во Хернинг, пак, ја победија Русија со 30:22 и беа поразени од Црна Гора со 22:20 и од Хрватска со 23:22. Резултати неспоредливи со ланското СП, на кое го загубија во мечот за бронзениот медал со 31:26 од Норвешка, а во идеалната седморка на шампионатот влегоа Марта Манге како најдобар десен бек и Бегоња Фернандез како најдобар пикер. Норвешка и' се испречи на „црвената фурија“ и во финалето на ЕП во Македонија, каде што славеше со 31:24.

Македонија и Шпанија досега се имаат сретнато три пати во официјални натпревари и во сите три македонските ракометарки беа подобри: во квалификациите за СП 1997 беше 28:22 во Скопје и 26:20 во Мадрид, а на ЕП 1998 во Хертогенбош беше 27:22. Шпанките, пак, победија со 28:26 во контролниот меч одигран во салата „Борис Трајковски“ на 30 ноември 2008 година, неколку дена пред почетокот на ЕП.

Другите двојки за баражот се: Чешка - Црна Гора, Холандија - Турција, Франција - Словенија, Хрватска - Србија, Исланд - Украина, Германија - Унгарија и Полска - Данска. Светското првенство во Бразил ќе се одигра од 3 до 18 декември.