Кумановска рампа за Работнички

Претпоследниот тим во кошаркарскиот шампионат Куманово до завчера имаше само две победи од 11 меча. Но, сега има три. Со оваа последнава со право може да се пофали. Остварена е над најтрофејниот Работнички (90:83).

Ниту симултанката на Димитар Мираковски (35 коша) не беше доволна да се надмине жешката атмосфера во Куманово. Домаќините, предводени од Дарко Матиќ (24 коша) и Дејан Микиќ (18) уште во првата четвртина ја покажаа својата огромна желба да го фрлат на колена фаворизираниот противник. Во почетните десет минути Куманово направи предност од 28:20, која до полувремето беше намалена на 51:46. Третата четвртина ја доби Работнички со 19:18, но последната му припадна на домаќинот со 21:18.

Иако Тони Симиќ постигна 17 коша и додаде девет скока, гостите, кои лошо шутираа слободни (16/26), ја загубија борбата под обрачите. Куманово имаше 11 скока повеќе (37:26).

Резултати од 13 коло: Куманово - Работнички 90:83, Струмица - МЗТ Скопје 72:75, Фени И. - Пелистер 105:44. Вчера играа: Овче Поле - Ултимејт баскет и Лирија - Торус. Табела: Фени И. 12/1, МЗТ Скопје 11/2, Работнички 10/3, Торус 8/4, , Овче Поле 4/8, Ултимејт баскет 4.8, Лирија 4/8, Струмица 4/9, Куманово 4/9, Пелистер 2/10.