Саботни муабети

„Камен е чупено - не ја бидва!“

Огнен Јанески

Си седам јас така, понеделнички, чмаејќи на ФБ и сосема случајно (како и секогаш) окцево ми „забега“ на едно видео поставено на профилот кај еден пријател, на кое Коралина Гоцева имаше свое музичко претставување на Ем-Ти-Ви филмските награди. Настап што се случил во февруари годинава, но јас сум го „промашил“.

Нејсе, го прегледав, зашто соработката на Коралина Г. со една наша еминентна музичка гр��па (којашто најдлабоко ја почитувам) ми е „музитастично“ (зборот е преземен од блог) добро направена. Се разбира, уште повеќе ми се допадна моментот што ја натерал некој Коралина да настапува со тенџериња, мијалник, ѓезвиња и слично, како права слика и прилика на насловот на песната (отсликувајќи модерна домаќинка – шпараџика), притоа облечена во пепито-измислица на нашата Саси Саковска, „стилисткиња“ блиска до миланската висока мода.

Но, ова досега е мое мислење, коешто не ми е споделено, па не знам дали е општо. Но, знам дека не знаев оти за Коралина Гоцева постоело општо мислење дека има проблем со комуникација со публиката. И во случајот, не целам на нејзините скудни изјави за ТВ, ни, пак, за нејзиното одлично „познавање“ на српскиот јазик, зашто во тој сегмент, освен мама Есма и тетка Опи, никој друг од нашето ѕвездено небо не се покажал, миЛо, дека го вЛадее овој некогашен „матерни језик“.

Но, да се вратиме на случајот.

„Па добро бе, мајка му стара! Камен е чупено – не ја бидва! Значи, не се научи да комуницира со публика и да се однесува на сцена - и не се научи. Па пенушка да беше - досега ќе научеше. А(!) застана на сцена, адушко, „сама себе го пее“. Како да е празна публиката. Како да нема никој. Ќе цитирам коментатори од Фејсбук!

Знам дека некој сигурно и' има речено да се обиде да искомуницира, но кога нешто не се носи во себе, нема ни корен за проникнување кон подобро. Затоа отсекогаш сум велел, па уште и на времето кога бараше дозвола од „мама да ја пушти“ – Коралина Гоцева е да ја слушаш - без да ја гледаш. Освен, ако не ти е „Плејбој“ на ум. Иако и таму не' зафркна! Фино и отмено, си остана по долна облека, на насловна, па ти потоа „радувај се“!

Јас кога го поставив видеото на мојот ѕид на ФБ, мислев дека сум еден од ретките што има такво мислење, но кога се изредија коментарите, неизбежно беше да го споделам тоа и во овој саботен муабет, зашто сфатив дека многумина си молчеле, а сепак повеќето го делат мислењето. Голем дел од коментарите не се баш најфини, па затоа нема да ги пренесувам интегрално, но, накратко, заклучокот беше дека К.Г. заслужува да биде една од водечките пејачки имиња во Македонија, зашто има фантастичен глас, којшто знаат како да и' го искористат, и во тоа нема дилема. Но, дека на која било српска турбоџанк-фолкерка може вода да и' носи за комуникација со публика – е тоа е вистина. А тоа го воочивме со компарирањето на некоја си „Новела из Босне“ и К.Г. И секако дека „Новела“ победи во категоријата. Иако односнава нема долги и убави нозе, вито тело, комплет убаво лице, а за глас да не правиме мангал-муабет.

Ајде, порано, додека беше помлада Коралина – велевме, ќе се научи, има време, ќе се искалеми. Но, ништо од калемењето. Си остана студена и со високо поставен ѕид меѓу неа и публиката.

Можеби и затоа на изборот на Агенцијата за млади и спорт на „Најдоброто од Македонија – музика“ – категорија „забавна“ се наоѓа на 10. место (до петок, проверени резултати). Иако има песни што се квалитетни.

Но, овој избор останува за во некое следно издание на саботните муабети со Огнен од Јаневци, зашто има материјал за пишување еден тон. Се разбира, почнувајќи од тоа дека песната (ако е тоа воопшто песна) „Комуњари и патриоти“ на Тоња Дрндуловска е меѓу топ-трите песни, иако е лансирана во македонската вселена годинава. А одбираме песни од изминатите 20 години!

Патем речено, нема „лутиш“ К.Г.! Сите сме во очекување на нешто ново од тебе, зашто ова досега што го направи, последните години, е квалитет што ќе ни остане.