Странски дрвца за домашни булевари

Допрва ќе се одлучува дали новите булевари ќе бидат разубавени со јапонска цреша, шумарест јасен, шпанска или друг вид елка

Деспина Трајковска

Исечените липи и тополи во центар и во Капиштец ќе се компензираат со странско калемено зеленило. Така барем планираат градските власти кои откако ги исекоа децениските дрвја заради проширување на неколку улици наскоро треба да одлучат какви и колку нови стебла ќе засадат по должина на булеварите. Ќе избираат помеѓу јапонска цреша, шумарест јасен, шпанска елка, а во игра се и уште три вида иглести елки.

Од „Паркови и зеленило“, задолжени за одржување на зеленилото, велат дека од Градот се' уште не донеле конечна одлука. Засега, единствено е истрасиран просторот на кој ќе се насади новото зеленило на проширената „Климент Охридски“. Додека се донесе конечна одлука за видот на дрвјата што ќе ги заменат липите, по должина на новиот булевар ќе има само трева.

„Градските власти се' уште не одлучија какви дрвја ќе садиме на посочениот потег. Единствено добивме налог во средишното зеленило, кое е широко околу 5 метри, да засадиме трева и тоа го завршивме неделава. Какви дрвја ќе има таму, не можеме да одлучиме, единствено ги препорачавме странските садници, претежно холандски, кои се калемени и ќе даваат посебен декор на новата улица“, вели Душан Авировиќ, директор на ЈП „Паркови и зеленило“.

Тој објаснува дека иако улицата е речиси готова, сепак, дрвјата ќе бидат засадени за не помалку од два месеца. Не само што од Градот допрва треба да одлучат дали сакаат таму да има јапонски цреши, шпанска елка, или некое друго од понудените странски дрвца, туку, како што посочува Авировиќ, дури наесен времето ќе биде погодно за садење. Единствено сигурно е дека дрвјата ќе бидат први од таков тип во Скопје. Кој вид и да се избере, ќе им дава специфичен изглед на улиците. Овие садници за разлика од досега садените по булеварите се поскапи и чинат околу 100 евра.

Од „Паркови“ гарантираат дека садниците ќе успеат на нашите климатски услови, а информираат дека ќе бидат засадени веќе оформени дрвца, што значи нема да биде потребно време да пораснат за да се добие саканиот ефект.

Инаку, освен по булеварот „Климент Охридски“, во план е со странски дрвца да се разубави и булеварот „Теодосиј Гологанов“, кој веќе се проширува, како и „Првомајска“, која допрва ќе се раскопува.

Липите курбан, на тополите

Од ЈП „Паркови и зеленило“ тврдат дека само исечените 70 липи кои неколку децении го красеа центарот по должината на „Климент Охридски“ отишле курбан на сметка на проширувањето на улицата. Иста судбина имаа и оние по должината на „Илинденска“.

Исечените тополи, пак, тврдат надлежните, секако, ќе биле исечени независно од проектот за ширење на „Теодосиј Гологанов“. Им минал векот. Освен во Капиштец, повеќедецениски тополи се исекоа и во делови на Карпош и во некои други населби. Сечата започна уште минатата година, но ретко на некое од оголените места во меѓувреме се засади ново зеленило.

им минал векот