Голема лекција за децата од паркот

Работнички убедливо поразен од Лацио на „Олимпико“ со 6:0 во првиот плеј-оф меч за Лига Европа

Сашко Ѓ. Димовски

Непријатен резултат за фудбалерите на Работнички во првиот плеј-оф меч за Лига Европа. На „Олимпико“ во Рим загубија од Лацио со 6:0 што е најубедлив пораз на дебармаалци во клупската историја на меѓународна сцена. Тимот предводен од Горан Петрески ја почувствува сета сила на калчолигашот што ја потврдија головите на Џибрил Сисе (51 мин. и 65 мин.), Ернане�� (20 мин.), Маури (39 мин.), Роки (87 мин.) и Клосе (90 мин.).

„Шестката“ во италијанската престолнина практично значи елиминација на трикратниот македонски првак во ова натпреварување по сите радости што ни ги приреди летово и формален реванш на националната арена „Филип Втори“ во Скопје во четврток.

Поразот е можеби неочекувано висок, но никако не смее да го разбуди инстинктот на хиените и да се тргне во растргнување на „младото месо“ од Градски парк. Тоа би било многу повеќе поразително и болно отколку самиот резултатски епилог во римската фудбалска арена. Кој како сака може да го толкува, меѓутоа, Работнички замина во Рим без искусните дефанзивци Панче Ќумбев, Игор Стојанов и стандардниот Горан Богдановиќ, иако понесе доволно надеж и верба во сопствените квалитети. Нивните позиции ги пополнија млади момчиња и играч за кого позицијата стопер не е негова природна средина. Во составот Петрески имаше и тројца, речиси, голобради фудбалери кои се свиткаа како ластари пред атмосферата на „Олимпико“. Впрочем како и целиот тим делуваа подисплашено, изгореа во респект кон противникот, како да беа преимпресионирани од ѕвездите на лацијалите и од амбиентот на трибините. Тоа е „болеста на адолесцентите“, кои пред се на физички план во однос на лацијалите беа како да споредуваш мува и слон.

На моменти изгледаа како да играат со врзани нозе стравувајќи од евентуален убедлив пораз што на крајот и се случи. Но, не е грев да се загуби од екипа од светски калибар како Лацио во чии редови има реномирани фудбалски имиња, репрезентативци на своите земји, со стотици истрчани километри во тешки и важни натпревари. Затоа поразот, колку и да звучи нелогично, не треба да се сфати како дебакл и разочарување туку како исклучително добра лекција за „децата на иднината“.

Работнички секоја година успева да искачи ниво. Лани во третото коло беше елиминиран од Ливерпул, годинава ќе заврши во плеј-офот по двомечот со Лацио. По редот на нештата логично е да се очекува, ако не го мине тој праг, барем да го одржи ваквиот тренд во наредните една, две или три сезони и во догледно време да биде учесник и во групи во некој од европските фудбалски купови. Многу нешта во однос на тоа, се разбира, ќе зависат и од политиката на клубот чие раководство не смее да се води само од финансискиот момент кога е играчкиот кадар во прашање и по секое успешно лето да го продава секој оној за кого ќе пристигне понуда за трансфер.

Лацио - Работнички 6:0

Полувреме: 2:0. Стадион: „Олимпико“ во Рим. Гледачи: 30.000. Главен судија: Сергеј Карашев. Помошници: Илја Баришников и Витали Дроздов (сите тројца од Русија). Жолти картони: Најдоски, Петровиќ, Д. Велкоски (Работнички). Стрелци: Ернанез во 20 мин., Маури во 39 мин., Сисе во 51 мин. и 65 мин., Роки во 87 мин., Клосе во 90 мин.

Лацио: Маркети, Раду, Дијас, Бијава, Скалони, Ледесма, Броки (Матузалем во 63 мин.), Маури (Лулиќ во 72 мин.), Ернанез, Клосе, Сисе (Роки во 85 мин.). Тренер: Едуардо Реха.

Работнички: Димитриевски, Тодоровски, Најдоски, Лазаревски, Петровиќ, Мицевски (Настевски во 43 мин.), Муарем (Глигоров во 77 мин.), Д. Велкоски, Вујчиќ, К. Велкоски, Маневски (Петковски во 85 мин.). Тренер: Горан Петрески.

Лига Европа, плеј-оф, први мечеви

Резултати: Легија - Спартак Москва 2:2, Екранас - Хапоел Тел Авив 1:0, Локомотив Москва - Спартак Трнава 2:0, Васлуи - Спарта Прага 2:0, Жестафони - Бриж 3:3, Хелсинки - Шалке 04 2:0, Литекс - Динамо Киев 1:2, Ворксла - Динамо Букурешт 2:1, Алесунд - АЗ Алкмар 2:1, Омонија - Салцбург 2:1, Австрија Виена - Газ Метан 3:1, Макаби Тел Авив - Панатинаикос 3:0, Стеауа - ЦСКА Софија 2:0, Тун - Стоук 0:1, Бешикташ - Аланија 3:0, Бурсаспор - Андерлехт 1:2, ПАОК - Карпати 2:0, Нордсјиланд - Спортинг Лисабон 0:0, Сласк - Рапид Букурешт 1:3, Стандард - Хелсингборг 1:0, Металист - Сошо 0:0, Фулам - Днипро 3:0, Хановер 96 - Севилја 2:1, Црвена звезда - Рен 1:2, Шамрок - Партизан 1:1, Розенборг - АЕК Ларнака 0:0, Слован Братислава - Рома 1:0, Диферданж - ПСЖ 0:4, Хартс - Тотенхем 0:5, Марибор - Глазгов Ренџерс 2:1, Национал - Бирмингам 0:0, АЕК - Динамо Тбилиси 1:0, Атлетик Билбао - Трабзонспор 0:0, Лацио - Работнички 6:0, Селтик - Сион 0:0, Риед - ПСВ Ајндховен 0:0, Атлетико Мадрид - Виторија Сетубал 2:0, Брага - Јанг Бојс 0:0.

Реваншите ќе се одиграат на 25 август.

Македонија Ѓ.П. со највисок пораз досега

Екипата на Македонија Ѓ.П. е со највисок пораз од сите македонски екипи на европската сцена досега. По минималната победа во Скопје против Бастија со 1:0, ѓорчепетровци загубија во реваншот во Франција со 7:0 во второто квалификациско коло во поранешниот Интер-тото куп.

Неславно мина и Милано, клуб кој повеќе не постои, во квалификациите за Купот на УЕФА во 2009 година Кумановци загубија во Копривница, Хрватска, од тимот на Славен Белупо со 8:2. Тежок пораз во Европа има и Беласица. Струмичани во квалификациите за Купот на УЕФА во 2003 година загубија во Целје со Публикум со 7:2.

Пет гола на домашен терен прими Вардар во средбата со Легија од Варшава (0:5) во 1999 година, со идентичен резултат и Беласица во 2003 година беше поразена во Струмица од Публикум (0:5), како и Башкими, клуб кој исто така денеска не постои, од израелската екипа Макаби Петах Тиква (0:5). Пораз со пет гола разлика на гостувањата во европските купови претрпеа уште Цементарница на средбата со Ленс (0:5) во 2003 година, Вардар кај Шалке 04 (0:5) во 2004 година. Црвено-црните примија пет гола и во 2006 година во мечот со белгиски Роселаре (1:5). Пораз со четири гола разлика има и Работнички. Во 2006 година дебармаалци загубија од Базел со 6:2. (М.М.)

Два дерби-меча во Скопје

Прва лига, 4 коло

Сабота: Тетекс - Силекс, Брегалница 2008 - Охрид 2004, Хоризонт Турново - 11 Октомври (16:30 ч.).

Недела: Металург - Работнички, Шкендија - Напредок (16:30 ч.), Вардар -Ренова (20 ч.).