Претходен број

Визите ќе се укинат идното лето?

Ако има силна политичка волја, а има во ЕК, но не и во сите земји-членки, би требало да се формулира препорака

Од нашиот дописник
Слободанка Јовановска

Брисел - Наредниот понеделник Европската унија ќе го разгледа напредокот на Македонија, Србија и на Црна Гора околу укинувањето на визите и од оваа средба ќе зависи дали има шанси процесот да се движи со полна брзина или ќе има мало закочување. Неофицијално, Брисел и натаму ја убедува, пред се', Македонија дека оддолжувањето од неколку месеци не треба да биде проблем, што значи дека визите би се укинале, ако има волја, до почетокот на летото, а не на почетокот на 2010 година.

Дотогаш, по се' изгледа, ќе се чека Србија и Црна Гора да ги исполнат условите, за да може укинувањето на визите да биде поголем пакет, бидејќи така побезболно ќе се спроведе новиот режим на Балканот.

Ако има силна политичка волја, а има во ЕК, но не и во сите земји-членки, во понеделник би требало да се формулира препорака, а предлогот за промена на шенген-режимот да дојде во јули или во јули.

Клучен момент, сепак, ќе биде состанокот на министрите за надворешни работи, по кој ќе биде јасно какво е дефинитивното расположение на земјите-членки и во каков рок можеме да очекуваме да се кренат шенгенските граници.

Ако тоа се случи во јуни, тогаш гласањето во Советот за правда и внатрешни работи во ноември или во декември би било формалност, бидејќи тогаш само ќе се решава за датумот кога ќе почне примената на новиот режим.

Тоа во практика значи дека македонските граѓани идната година ќе патуваат без визи во речис�� сите 27 земји-членки на ЕУ, со исклучок на Велика Британија, Ирска и Данска, исто така, и во сите нови земји-членки на ЕУ, иако тие се' уште не се дел од шенген-зоната, како Бугарија, Полска, Романија и други.

Тоа речиси сигурно ќе повлече и бран повлекување на шенгенските ѕидови на други земји надвор од Европа, бидејќи повеќето држави од светот својата политика ја хармонизираат со таа на Брисел. На Македонија, според извештајот, и' останува да го поправи статусот на Ромите, да го донесе законот за антидискриминација, да ја заврши централната база на разузнавачки и други податоци и да го заврши издавањето нови биометриски пасоши, за да има комплетно чисто досие пред Унијата.

Но, и ваква каква што е оцената на Брисел за нашите постигнувања е охрабрувачка, бидејќи се регистрира прогрес во оваа сфера, за кој не сме ни биле свесни во земјава. Во извештајот, имено, е наведено дека Македонија постигнала многу добар напредок во безбедноста на документите и оти досега издала повеќе од 417.000 биометриски пасоши според ЕУ-стандардите, а тој процес целосно ќе заврши до 2012 година. Вработените во овие одделенија, според ЕУ, се добро обучени и селектирани и досега не е откриен ниту еден случај на корупција околу издавањето на документите, што е многу важно за Брисел, по сите фалсификати и продадени пасоши во регионот.

Во делот за справување со имиграцијата е наведено дека е постигнат значаен напредок, оти граничната полиција функционира според ЕУ-стандардите, дека има добра соработка меѓу агенциите, оти вработените во оваа област се многу професионални и мотивирани и азилантските процедури се функционални и ефикасни. Останува, според ЕК, да се донесе нов закон за внатрешни работи, да се подобри проценувањето на операционалните ризици и граничните премини технички да се модернизираат.

Исто така, се бара да се унапреди централната база на податоци за странците во државата, и да почне имплементацијата на стратегијата за интеграција на бегалците и на мигрантите, нешто што не е проблем сега туку ќе биде многу повеќе во иднина, кога ќе падне визниот режим, бидејќи сега Македонија не е атрактивна за мигрантите и за илегалците. Во областа на јавниот ред и сигурност оцената е дека е постигнат значаен прогрес, дека е засилена законската рамка во однос на трговијата со луѓе, борбата против дрогата и организираниот криминал, но дека треба да се засили административниот капацитет на институциите, кои се справуваат со тоа.

Затоа се бара воспоставување национална база на разузнавачки податоци и засилување на борбата против корупцијата, иако и таму се забележува напредок во употребата на специјални методи за нејзино откривање. Во делот на фундаменталните права и надворешните релации оцената за Македонија е дека е „добро напредната“, со забелешка дека се' уште значаен број Роми немаат лични документи и оти законот за антидискриминација се' уште чека во Собранието. (С.Ј.)