Претходен број

Поглед

Пратеници - измамници

Оливера Војновска

Пратеник во македонскиот парламент се изјасни во име на свој колега кој беше отсутен од седницата, со што фактички го фалсификуваше гласањето за закон што се носи со двотретинско мнозинство. Тоа само по себе е скандал. Но, за жал, ваквата демонстрација на примитивизам и некултура не наиде на осуда. И, наместо да се инсистира случајот да се расчисти и да се обелодени кој си дозволи најбезобѕирно да лаже пред целата јавност, се молчи. Скандалот се минимизира. Иако прашање е колку пати досега се случило ова, особено со пратениците анонимуси, на кои гласот не сме им го слушнале.

А доколку се сака, не е некаков подвиг да се расветли настанот. Нема потреба од којзнае каква истрага. Присутните во салата забележале дека „јунакот“ е од средниот ред, каде што седат пратениците од ВМРО-ДПМНЕ, башка има снимки од собраниските камери. Секако, би било доблесно самиот да ја признае грешката и да ја напушти функцијата. Само очигледно е дека се нема храброст за такво нешто, или се води сметка за имиџот на партијата. И во еден таков резон најбезболно е срамот да го понесе парламентот.

Нашите пратеници двапати одеа на обука по демократија во Велика Британија и уште во два наврата британски парламентарци им држеа предавања во Македонија. Но, изгледа ништо не научија.

Деновиве спикерот на британскиот Парламент, Мајкл Мартин, поднесе оставка на својата функција поради алчноста што ја покажаа некои од британските пратеници. Скандалот ја тресе британската јавност, Мартин им се извини на гласачите и како морален чин ќе се повлече од спикерското место. Така е тоа во демократскиот свет. Во нашата тажна балканска приказна таквите манири на однесување се мислена именка.