Претходен број

Брисел бара уште апсења и мирни избори в недела

Милошоски во мисија да ја дистанцира Владата од нерегуларностите на Албанците

Од нашиот дописник
Слободанка Јовановска

БРИСЕЛ - Министерот Антонио Милошоски се обиде вчера во Брисел да ја дистанцира владејачката партија од инцидентите што можат да се повторат в недела, најавувајќи го она што Европската унија во моментов најмногу го посакува, односно предизвикувачите на насилствата да се казнуваат неселективно, заради легитимност на изборите и заради потребата колку- толку да се спаси имиџот на државата.

„За Македонија е важно финалниот извештај за изборите да биде позитивен, а за да биде таков одговорноста за нерегуларностите мора да биде конкретизирана и персонализирана и учесниците да бидат казнети“, изјави Милошоски по средбата со еврокомесарот Оли Рен вчера рано наутро. Според него, превентивните мерки што ги најавува Владата ќе бидат оценети како успешни само ако имаат траен исход според законската регулатива, а бидејќи во Македонија се бориме за еднаквост и рамноправност, „еднаквоста и рамноправноста пред законот е вклучена во тоа, па институциите се решени да ја спроведат“, изјави тој, сугерирајќи очигледно дека нема веќе да има толеранција за радикалните настапи на албанскиот фактор.

Изборите беа една од трите пораки што ги доби Милошоски од еврокомесарот за проширување. Другите две беа дека Брисел очекува новата влада да се фокусира што е можно побрзо на исполнувањето на осумте предуслови и да го реши спорот околу името, кој е билатерален, но ја кочи нашата евроинтеграција. И покрај тврдењата дека владејачката гарнитура во Македонија е решена да стори се' да се надмине оваа пречка, Милошоски изрази сомнеж пред Рен дека Атина е мотивирана да се случи тоа, бидејќи потезите што ги влече говорат дека проблемот го злоупотребува за остварување на внатрешни и надворешно-политички цели. „И во 1991 и 1992 година Грција ја блокираше самата независност на Македонија, но тоа не траеше вечно. Некој може да блокира нешто за некој период, но не се' и засекогаш“, беше одговорот на Милошоски на новинарските оцени дека изгледите на Македонија да добие датум за преговори без исход околу името не се многу реални.

Посетата на Милошоски беше темпирана пред состанокот на шефовите на дипломатиите на ЕУ идниот понеделник и пред министерскиот состанок на НАТО денес и утре, на кои ќе стане збор за нашите избори, како и за неодржливата состојба на статус кво со евроинтеграцијата. Според она што се дознава, заклучоците за министерскиот состанок на ЕУ, кој претходи на средбата на лидерите истата недела, ќе имаат голем простор посветен на Македонија, а крајната интонација ќе се даде непосредно пред средбата, бидејќи се чека исходот од прегласувањето.

Според дипломатски извори, во нацрт- документот што циркулира сега се изразува жалење за насилствата, инцидентите и сериозните слабости на изборите пред две недели, при што ќе се повикаат властите да ги истражат и да преземат соодветни мерки. Исто така ќе се поздрави најавата од властите во Македонија дека на овие прашања ќе им се посвети без одлагање и се изразува надеж дека што поскоро ќе биде формиран новиот парламент, бидејќи е неопходно да се продолжи што е можно побрзо и со реформите. ЕУ- министрите ќе ги повикаат, исто така, сите политички партии да придонесат за конструктивен и инклузивен дијалог, и во зависност од исходот на гласањето в недела, можно е на самитот да се најде уште еден дел кој ќе отвори простор за давање датум за преговори на крајот на годината, но ќе биде далеку од тоа да навестува таква одлука. Во него ќе стои дека следниот чекор кон започнување членство ќе биде можен само по исполнувањето на сите услови спомнати во критериумите од Копенхаген и од Спогодбата за асоцијација и стабилизација, со што ќе се избегне директното спомнување на спорот околу името, но реално тој и натаму ќе фигурира како пречка.

Грчките притисоци деновиве се насочени во два правци - да се вметне поконкретно спорот околу името како услов за датумот за преговори за Македонија и да се оцрни што е можно повеќе ситуацијата во земјата, бидејќи слободни и фер избори се клучните услови во критериумите од Копенхаген. Во НАТО, до вчера немаа објаснување што ќе се случи со поканата на Македонија, бидејќи станува јасно дека нема шанси да се реши спорот до 9 јули, па во Алијансата се' подлабоко заглавуваат околу ова прашање, иако официјално ставот е дека не се инволвирани. Колкав е рокот на поканата и дали ќе важи, без оглед на случувањата во Македонија, може ли да биде суспендирана и слично се прашања околу кои има голем молк во Алијансата.