Сколари на клупата на Челзи
Актуелниот вицешампион на Европа и Англија, Челзи, објави дека за нов тренер на тимот е именуван сегашниот селектор на Португалија, Луис Фелипе Сколари (59). Бразилецот на привремена работа во Португалија на „Стемфорд Бриџ“ доаѓа на местото на Аврам Грант кој доби отказ минатиот месец по поразот на „сините“ од „Стемфрод Бриџ“ во финалето во Лигата на шампиони од Манчестер Јунајтед.
„Фелипе има извонредни квалитети. Тој е еден од најдобрите светски тренери, човек со големи успеси на клупски и репрезентативен план. Знае да извлече максимум од група талентирани играчи. Згора на тоа неговите стандарди одговараат на нашите во клубот“, стои на официјалната интернет страница на Челзи.
Сколари е на кормилото на португалската репрезентација од 2003 година. Претходно беше кормилар на неколку бразилски екипи, а во 2002 година го предводеше Бразил до шампионската титула на мундијалот во Јапонија и Јужна Кореја. Функцијата на „Стемфорд Бриџ“ ќе ја преземе на први јули. |
