Рикер

Рамковниот договор клуч за евроинтеграциите

20.06.2011, 12:46

На Универзитетот на југоисточна Европа во Тетово започна меѓународната конференција посветена на десетгодишнината од потпишувањето на Охридскиот рамковен договор. Како коорганизатори на конференцијата се јавуваат Универзитетот од Колумбија од САД, државниот Тетовски Универзитет, како и Универзитетот „Св. Кирил и Методиј“ од Скопје каде утре ќе се одржи вториот дел од оваа конференција.

На првиот дел од конференцијата свои излагања имаа претставниците од меѓународната заедница. Како што истакна амбасадорот на САД во земјата, Филип Рикер, спроведувањето на Рамковниот договор е процес од витално значење за земјата и нејзината иднина. Тоа, според него е клучот за евроатланските интеграциии и е примарна политичка цел, неподелено присутна кај сите политички партии и скоро кај целата популација, без оглед на партија, религија или етничка припадност.

На останатиот дел од конференцијата зборуваа и амбасадорот на Република Унгарија, претставникот на Европската Унија, амбасадорот на Шведска и амбасадорот на Велика Британија. Свое обраќање имаше и вицепремиерот задолжен за спроведување на Рамковниот договор, Абдулаќим Адеми, како и поранешниот претставник на Европската Унија во Македонија Сорен Јесен Петерсен.

Во вториот дел од конференцијата насловен како „Дипломатско – историски дел“ што ќе биде воден од Џејмс Пердју, еден од медијаторите на Рамковниот договор, ќе учествуваат и политичките лидери Љубчо Ѓоргиевски, Бранко Црвенковски, Али Ахмети и Мендух Тачи.