До кога политичарите ќе не' демнат од билбордите?

Партиските ликови се' уште ни се насмевнуваат од рекламите

„Дали на вашите избори учествува само еден човек?“ Вака пред дваесетина дена своите скопски пријатели ги праша еден гостин од соседна Грција, збунет од глетката дека на сите билборди, џамбо или обични е лидерот на ВМРО-ДПМНЕ, Никола Груевски. Сам или во придружба на двајца-тројца граѓани, сеедно, неговиот лик е секаде.

Но, изборите завршија пред 12 дена, а Скопје, автопатиштата и цела Македонија се' уште се преплавени од политичките лидери, односно од билбордите на Груевски, бидејќи владејачката партија предничеше во рекламирањето во оваа кампања.

За волја на вистината, се' уште има по некој полууништен билборд на Љубе Бошкоски, како и на Либерално-демократската партија на експретседателот Јован Манасиевски, но со оглед на тоа дека првиот е во истражниот затвор во Шутка, а вториот се повлече од функцијата, неумесно е да се прашува до кога граѓаните ќе ги гледаат нивните билборди иако постои законска обврска за отстранување на сите билборди и други рекламни материјали.

Од „Лазов груп“ велат дека тие ја завршиле работата. Богдан Тодоровски ни изјави дека од нивните објекти изборните постери се тргнати пред пет дена. Неофицијално, дознаваме дека џамбоплакатите што не' демнат од сите раскрсници и фасади на поголемите згради се на „Акцент медија“, меѓутоа оттаму не добивме одговор кога ќе ги отстранат, со објаснување дека одговорните се отсутни.

Во екот на кампањата, кога СДСМ и ВМРО-ДПМНЕ се препукуваа кој колку потрошил за рекламирање и кога опозицијата соопшти дека во време на криза, кога секое трето семејство во државата е сиромашно и не може да го протурка месецот, слушнавме и конкретни обвинувања.

„За кампањата ВМРО-ДПМНЕ има закупено најмалку 1.000 билборди. Согласно со ценовниците, вкупниот трошок за креативно решение, печатење и закуп на еден билборд е 1.500 евра. Значи, само за билборди ДПМНЕ потроши 1,5 милион евра“, порачаа од „Бихаќска“.

Социјалдемократите потсетуваат дека на претходните избори нивните билборди биле тргани непосредно по соопштување на резултатите, а партискиот подмладок спроведувал акции за симнување на плакатите залепени низ градот.

Директорот на Центарот за комуникации на ВМРО-ДПМНЕ, Илија Димовски, не одговараше на нашите повици, а никој друг во партијата нема овластувања за давање какви било изјави. Оттаму останува отворено прашањето - дали наредените билборди сугерираат дека можеби некој очекува повторни избори или, пак, чинеле ептен многу, па сега не им се тргаат. (Б.Ј.)