Претходен број

Сантана го исполни ветувањето во Скопје

На сцената доминираше музиката во сосема чиста форма, водена и подредена, пред се', на виртуозноста на гитара на Сантана, „неоптоварена“ со спектакуларни сценски елементи

Јасминка Павловска

Ветувањето за две и полчасовен концерт, Карлос Сантана, музичар, рок- ѕвезда со четиридецениска кариера, го исполни речиси до минута, во петокот, на 10 јули, на Градскиот стадион во Скопје. Деклариран „верник“ во идеите на хипи движењето (дури и се залага за легализирање на марихуаната), Сантана, сепак, е професионалец од светски калибар и концертот го започна точно на време, во 21 часот, не „почитувајќи“ ја навиката на своите колеги - рокери за задолжително доцнење на почетокот на концертите.

Пет-шестилјадната публика на Градскиот стадион уште со првите тактови од гитарата на Сантана и неговиот десетчлен бенд (двајца пејачи, три - ударачки секции, двајца - дувачки инструменти и уште двајца гитаристи), го фати ритамот и енергијата на звукот, „дефиниран“ како спојка на рок, џез, соул и латино.

На сцената доминираше музиката во сосема чиста форма, водена и подредена, пред се', на виртуозност на гитара на Сантана, „неоптоварена“ со спектакуларни сценски елементи. Немаше дури ни видеобим на сцената, но комуникацијата меѓу публиката и сцената функционираше како под една диригентска палка.

Извици и рамномерно аплаудирање ги следеа песните „Марија, Марија“, „Into night“, „Smut“, „Black magic woman“, „Оје комо ва“..., но скопскиот концерт на Сантана во петокот беше акцентиран на инструменталите, каде што неговата виртуозност на гитарата доаѓа до полн израз. Всушност, не бадијала, Сантана е на 15. место на листата на списанието „Ролингстоунс“ на стоте најголеми гитаристи на сите времиња.

Дека неговите хипи верувања не се само приказна за медиумите, Сантана покажа и во живо, со еден пригоден говор за љубов, мир... и дека со заеднички сили војните и бруталноста можеме да ги претвориме во толеранција, нежност и еднаквост. Сето тоа беше кажано со тактовите на песната „Love suprime“.

По двочасовното музицирање екипата на Сантана се повлече накратко зад сцената, но брзо се врати на првиот повик за бис, за кој беа планирани „Corason espinado“ и динамично заразната „Џинго“.

Сантана со својот концерт во Скопје донесе атмосфера и енергија, која ве понесува да ги минимизирате непријатностите од дрскиот претрес на обезбедувањето на влезот во стадионот и сиот наш, локален, речиси неизбежен организационен „фолклор“.