Контоминас посредувал за поткупот во Телеком?

Слаѓана Тасева, вели дека има информации оти грчкиот бизнисмен е сопственик на една од фирмите, преку која, наводно, требало да бидат извршени спорните трансакции

Жаклина Хаџи Зафирова



Моќниот грчки бизнисмен Димитрис Контоминас е посредникот во наводниот поткуп на македонските политичари во случајот со „Дојче телеком“ и „Маѓар телеком“, кој вчера го обелодени Слаѓана Тасева, претседателката на „Транспаренси интернешнел Македонија“, повикувајќи се на официјални податоци кои ги добила од кипарските власти. Тасева на вчерашната прес-конференција во детали образложуваше за инволвираноста на грчкиот бизнисмен, за кого од Централниот регистар на Кипар добила информација дека е сопственик на „Чаптекс холдинг“, една од фирмите преку која, наводно, требало да бидат извршени спорните трансакции, а за кои претходно се согласил да се реализираат преку неговите фирми. Тасева коментираше и дека случајот со кој се имало намера да се попречи либерализацијата на македонскиот пазар на телекомуникации е многу поголем и вклучува повеќе луѓе, пари и институции кои би требало да се позанимаваат со оваа, како што ја нарече, коруптивна шема.

„Тој посредник прифатил дејствата на трансакциите да бидат извршени преку неговите компании. Тие се наведени со име во извештајот. Тие се ’Космотелко валиу’ и ’Чаптекс холдинг’. Преку тие компании требало, тоа е претпоставка, парите да стигнат до високи функционери во Македонија. Дали стигнале и што се случило, американските органи останале на претпоставка, а нашите велат дека истражуваат“, изјави Тасева на вчерашната прес-конференција.

Таа оцени дека воопшто не било тешко нејзината организација да провери кој стои зад овие фирми. Од Централниот регистар на Кипар добиле информација дека како сопственик се појавил „многу моќен човек, голем бизнисмен“, кој, според неа, „во времето кога се случувале дејствата опишани во ревизорските извештаи и обвиненијата, бил присутен во Македонија и имал состаноци со наши високи функционери“.

„Не може да го кажеме името, а да не може тоа име да се препознае. Тоа е јасно нотирано во сите овие документи. Станува збор за Димитрис Контоминас, кој бил склучувач претходно на договорот за остварување на интересот за фиксната телефонија во Грција и бил сопственик на акции во ’Камени мост’ и други фирми кои поседувале акции во ’Македонски телеком’. И тие акции подоцна ги продал на Владата. Имаме многу силна лоби бизнис- врска, која е нотирана како посредник во самиот извештај, кој го читаме од обвинителството на САД. Извештајот е многу поголем и по тежина на делата и лицата вклучени во делото“, рече Тасева. Шемата, според неа била таква што тројцата извршители од „Маѓар телеком“, чии имиња се знаат, ја осмислиле целата работа, според која издејствувале средствата да се исплатат преку незаконски договори. Во целата работа бил вклучен посредник кој наводно контактирал со нашите функционери.

„Преку компаниите ’Космотелко велиу’ и ’Чаптекс холдинг’, претпоставка е дека парите требало да стигнат до високи функционери во Македонија“, рече Тасева. Таа нагласи и дека според нивната анализа не се совпаѓаат не само лицата кои се гонат, туку и сумите бидејќи Американците ја водат истрагата за 4,8 милиони евра, а македонските власти за 900 илјади евра помалку зашто во истрагата не е вклучен еден договор. Тасева оцени дека случајот требало да го следат повеќе институции, а не тој да биде третиран селективно.

„Сите договори се реализирани преку прикривачки компании и компании поврзани со посредниците и се антидатирани, односно внесени во време кое не соодветствува со времето кога се исплатени. Во двата извештаи се наведува ’Камени мост’, и понатаму кипарската ’Фишек компанија’ преку која се реализирани овие зделки“, наведе Тасева. Таа додаде дека случајот може да се води како постапка за злосторничко здружување бидејќи постои организирана група која се создала за оваа намена и имала за цел извршување на поголем број кривични дела.

Таа рече дека иако сега се гонат само извршителите, сепак во целиот случај имало три фази: подготовка, посредување и извршување. Тасева вели дека врз основа на ревизорскиот извештај „Маѓар телеком“ побарал поширока истрага која го опфаќа периодот од 2000 година, односно и периодот пред приватизација на „Македонскиот телеком“, што, според неа, значи дека индикации можат да се бараат и во тој период. Понатаму, рече таа, истрагата не ги опфаќа и оние засегнати во случајот кои наводно ги бришеле документите, кои подоцна биле повратени од компјутерите кои се наоѓале во „Телеком“. „Тоа било со цел да се попречи истрагата, а е исто кривично дело кое никој не го опсервира“, вели Тасева, која вчера ја образложи деталната анализа која ја направиле во „Транспаренси интернешнел Македонија“ врз основа на ревизорските извештаи и постапките кои паралелно се водат кај нас и кај американските власти.