Мое ќоше

Одете во Струга

Ерол Ризаов

Зошто власта и опозицијата бегаат од Струга и од Струшко

Претседателот Ѓорге Иванов, премиерот Никола Груевски, лидерите на големите политички партии во власта и во опозицијата Али Ахмети, Мендух Тачи и Бранко Црвенковски деновиве мораа да бидат во Струга и во Струшко меѓу народот. Не за да го мерат својот рејтинг и да видат колку се омилени и сакани, не да држат предизборен митинг и политички маркетинг, туку да го изгаснат огнот кој може да ја запали државата. Тоа им е најзначајната уставна обврска и должност да не дозволат нереди и дестабилизација на Македонија.

Тие со денови не можат да стасаат до Струга, која им стана некако многу далечна и непријатна станица. Всушност, сакаат да одат во Струга и во Вевчани и секаде каде што има аплаузи и каде што ќе им се воодушевуваат. Кај што гори.... не е баш пријатно. Ако си блиску до огинот, може да се изгориш. Затоа храбро и државнички одлучија настаните да ги следат од подалеку и да си останат таму каде што се. Додека малку не се расчисти димот, ќе ни праќаат утешителни соопштенија дека ситуацијата е под контрола и нема потреба од голема возбуда и страв. Првите изјави широкоградо им ги препуштија на пониските партиски ешалони и на градоначалниците на Струга и на Вевчани. Засега главен збор имаат пациентите кои редовно се јавуваат на терапија во утринските и вечерните ТВ-емисии и кои ја загрозија славата на најдобрата народна забава, знаете онаа со црни и бели инсекти. Сега од сите телевизии ечи гласот на накострешените радикали и милитанти кои само што не тргнале во крстоносна војна за одбрана на верата. Во ова најмногу им помагаат силните експерти, аналитичари и коментатори кои први ја убиваат вистината пред да почне трагедијата.

Навистина, зошто нашите најодговорни функционери никако да стасаат до Струга, иако требаше да бидат таму, пред првите најави дека нешто не е в ред. Тешко е да се поверува дека разузнавачките служби и полицијата и други надлежни институции на системот затаиле и немале навреме информација дека нешто опасно се тркала низ Македонија за да застане во Струга. Превентивното политичко и институционално реагирање во спречување на жаришта кои можат да ја дестабилизираат државата е одамна позната работа и е најзначајната обврска за стабилност и контрола на ситуацијата. Особено се опасни ваквите инциденти што прераснуваат во кризни ситуации кои лесно излегуваат од контрола кога конфронтациите се меѓуетнички и верски. Овој пат настаните се одвиваа прилично бавно и не беа експлозивни при самата своја појава. Прво, како што е вообичаено, работите почнаа да засмрдуваат на нешто пострашно кога навивачите во друга држава почнаа да пеат за клетите Шиптари во мигот кога Македонија се радуваше на победите и големиот спортски успех. Потоа уследија реакциите за смрт на каурите. И така со ред, како што ни прилега и доликува на најрепрезентативните примероци на балканштината.

Вевчанскиот карневал даде најсилен придонес да стаса пораката до сите што не веруваат во опстанокот на Македонија. Луцидните Вевчанци ја погребаа Грција и го претворија Куранот во машки полов орган. Силна и многу духовита порака за добрососедска и права комшиска љубов испратија мудрите вевчанци нема што. Пораката е примена со восхит, па од преголема љубов почнаа да се сквернават цркви, крстови, да пламнуваат нови пожари. Сигурен сум дека оваа вевчанска патрдија или перверзија, во зависност од тоа кој како гледа и чувствува, допрва ќе го обиколи светот и ќе и' донесе многу пријатели на Македонија. Се' уште никој не се чувствува виновен, ниту се оградува, ниту се извинува за сторените срамни дела кои ги навредуваат верските чувства, но и човечкото достоинство кај оние што не се многу по верата. Партиската полиција додека не добие наредба од партиските штабови, нема да приведе никого и нема да соопшти ништо. Само ќе плаши мали деца со своето нагласено присуство. Сето ова се одвива со денови во Струга и во Струшко, но сознанијата на полицијата и надлежните служби не беа доволен мотив за превентивно дејствување на политиката и политичките лидери и водачи. Не е можно да не го знае полицијата она што нашироко пишуваат и известуваат медиумите. Напротив, станува мошне веројатно дека власта остави од свои потреби и причини работите да клокотат во струшкиот котел до точка на вриење. Дали се' уште сме во некоја контролирана регионална дестабилизација на државата од која ќе не' спасуваат нашите патриоти или, пак, работите излегоа од контрола ќе се знае мошне бргу. Како и де е, не е на арно.