01.02.2012, 15:55 Принцот Мајкл најави нови британски инвестиции
ФОТО: Киро Попов
Формирање два фонда од кои еден земјоделски и друг инвестициски, со вредност од околу 100 милиони евра се првичните резултати од посетата на високата бизнис делегација од Велика Британија што деновиве престојуваше во работана посета на Македонија предводена од принцот Мајкл од Кент.
- На самиот почеток како што можеби знаете, формиравме Земјоделски фонд, кој ќе почне да работи овде за неколку месеци. Потоа, ќе има и нов кол центар со кој се надеваме дека ќе се отворат околу 150 нови работни места овде во Македонија во текот на наредните шест месеци. Во голема мера се надеваме дека ќе може заедно да инвестираме во еден од вашите ски центри. Сетоа ова се многу добри вести и навистина ова не охрабрува. Јас би сакал да видам поголем напредок и дека Британија станува посвесна за добрите вести кои доаѓаат од Македонија. Ова би можело да се постигне преку дигиталните медиуми што е област во која Британија е светски лидер, вели принцот од Кент во интервју за неколку македонски медиуми, сумирајќи ја посетата на Македонија.
Тој оценува дека секторите кои се најпривлечни за британските инвеститори се рударството, туризмот, хотелиерството, финансиските услуги, инфаструктурата како управувањето со води и со отпад. Укажа и на образованието, бидејќи, вели, во Македонија има мошне млада популација и многу голем процент од БДП, околу шест проценти се наменува за обраованието. Најдобриот начин да се направи тоа е преку т.н. генерички фонд наменет исклучиво за Македонија.
- Би сакале да формираме генеричка македонска област за инвестиции за да се покријат сите аспекти на инвестициите, посочува членот на британското кралско семејство.
Според претставник на Британската бизнис група, која ја организираше посетата на принцот во Македонија, првичната вредност на Земјоделскиот фонд би изнесувала 50 милиони евра средства кои би се инвестирале во земјоделството и тој би ги покривал и Косово и Албанија. Привлечноста на земјоделството за британските инвеститори појаснуваат, е во тоа што во регионот цената на агрикултурното производство е пониска од онаа во ЕУ, производите се со висок квалитет, законодавството е усогласено, а помага и близината на пазарот.
|
