31.01.2012, 15:12 И виното на „Тиквеш“ патува за Британија
Принцот Мајкл од Кент и претставниците на британската бизнис-заедница при нивната денешна посета на најголемата винарска визба во Југоисточна Европа добија уникатен примерок од црвеното вино „Тиквеш - Бела вода“, берба 2010. Станува збор за првото и засега единствено вино од Македонија, но и од регионот, кое најпознатиот светски вински критичар Роберт Паркер го оцени со високи 94 поени, со што ова македонско црвено вино и официјално се вброи меѓу најценетите вина во светот.
„Посетата и вниманието од Принцот од Кент за нас, како најголем производител на вино во земјава, претставува голема чест, но и одлична можност да го презентираме врвното македонско вино, кое е потврдено по вкусот на љубителите на квалитетното вино во Британија и во светот“, изјави генералниот директор на винарската визба „Тиквеш“, Игор Илиевски.
Инаку, најголемата македонска винарија и досега има забележителен настап на пазарот на вино во Британија. Дека врвното македонско вино е ценето на овој пазар говорат и највисоките признанија и медали што вината на „Тиквеш“ секоја година ги добиваат на Лондонскиот саем на вино.
Од „Тиквеш“ се надеваат дека ваквите посети и добивањето највисоки оценки за квалитет од страна на реномирани светски вински критичари, ќе придонесат за понатамошна засилена промоција и пробив на квалитетното македонско вино на најзначајните светски пазари. (Ек.Р.)
|
