30.01.2012, 15:04 Џафери: Ќе ги преземеме сите мерки за смирување на страстите во Струга
Протестите во Струга создаваат лоша клима и ја нарушуваат меѓусебната почит и доверба. Ќе ги преземеме сите мерки на локално и на централно ниво за да се смират страстите
Ова го изјави вицепремиерот за спроведување на Рамковниот договор Муса Џафери по средбата во Владата со албанскиот амбасадор во Македонија Арбен Чејку, во одговор на новинарско прашање.
- По анализата на настаните ќе се преземат сите неопходни мерки за организаторите. Не можам однапред да прејудицирам кој ќе биде обвинет. Целта е да се смират страстите и состојбата да се нормализира, онака како што очекуваат граѓаните од претставниците на централната и на локалната власт, нагласи Џафери.
Сите настани, посочи, треба да се канализираат до институциите кои се надлежни.
- Како јавен функционер нема да си дозволам политички да ги осудувам, ниту едните, ниту, пак, другите пред да ги истражиме сите настани, бидејќи може да направиме двојна грешка и дополнително да ги иритираме страните. За жал неочекувано и во 2012 година кај нас се уште се случуваат провокативни настани кои емоционално ги провоцираат граѓаните независно од која страна и да се, рече вицепрмеиерот Џафери.
Прашан за негова можна смена од местото вицепремиер за спроведување на Рамковниот договор, Џафери рече дека не е морално да дава одговор на прашањето бидејќи е објект на шпекулации.
- Обврска на партиските органи е да ја оценуваат работата на сите функционери, па потоа како партија да извлечеме заклучоци колку кој заслужува за понатаму да биде на јавна функција, појасни Џафери.
На средбата со амбасадорот Чејку, станало збор за координирање на активнстите меѓу двете земји за одбележување на 100-годишнината од независноста на Албанија.
Јубилејот, рече албанскиот амбасадор во Македонија, треба да биде надвор од секакво политичко влијание и додаде дека Албанија ги поддржува евроатлантските интеграции на Македонија.
- Зборувавме за неколку значајни теми поврзани со меѓусебните односи, за значењето на целосносто спроведување на Охридскиот договор, како и за ангажирањата кои се прават во врска со одбележувањето на 100-годишнината од независноста на Албанија, изјави амбасадорот Чејку.
Тој посочи дека станало збор за догворите кои се во процес на склучување и оние кои треба да се направат во иднина, како што е договорот за слободно преминување на државната граница без пасоши и договорот за водите.
|
