30.01.2012, 12:39 Шешељ од Хашкиот трибунал бара отштета од два милиони евра
Обвинетиот од Хашкиот трибунал Војислав Шешељ поднесе барање Судот во Хаг да му исплати отштета од два милиони евра поради непочитување на елементарните човекови права за време на неговиот деветгодишен притвор, соопшти Трибуналот.
Шешељ поради обидот да му се наметне адвокат бара отштета од 300.000 евра, а поради оневозможување да се запознае со правните извори на кои се повикува Судскиот совет во своите одлуки и Обвинителството во своите поднесоци бара дополнителни 100.000 евра.
Поради тоа што Хашкиот трибунал одбивал да му доставува материјал на српски јазик и на хартија, Шешељ бара уште 100.000 евра, поради повеќегодишното кршење на правото на правна помош 200.000, а поради оневозможување на комуникација со правни советници, исто така, 100.000 евра.
Поради недозволувањето контакти со семејството, пријателите, лекар и слично побарал 200.000 евра, поради кршење на правата на финансирање на трошиците за одбрана и нарушување на принципите на еднаквост 400.000, а поради намерно одолговлекување на процесот 500.000 евра.
Шешељ, на крајот, бара и 100.000 евра поради судење за делото „непочитување на судот“, кое не е пропишано со Статутот на Хашкиот трибунал и нема поткрепа во меѓународното вообичаено право.
Воислав Шешељ речиси девет години се наоѓа во хашкиот затвор, а судењето му започна на 7 ноември 2007 година.
|
