31.01.2012, 11:20 Членките на ЕУ постигнаа договор за фискалниот пакт
Земјите-членки на ЕУ, со исклучок на Велика Британија и Чешка, доцна синоќа постигнаа прелиминарен договор за воспоставување фискален пакт, чиј иницијатор е Германија.
Договорот, постигнат на синоќешниот вонреден Самит на ЕУ во Брисел, предвидува строги мерки на штедење за земјите кои претендираат на пристап до стабилизацискиот фонд вреден 500 милијарди евра, кој пак ќе им овозможи добивање на поволни кредити.
Потписничките на договорот за фискалниот пакт на еврозоната се обврзуваат на намалување на сопствените буџетски дефицити на ниво од под три отсто од бруто домашниот производ, а за непочитување на оваа обврска покрај тоа што губат пристап до средстрава од стабилизацискиот фонд, можат да заработат и тужби пред Европскиот суд на правдата поради пробивање на плафонот на буџетскиот дефицит.
Потпишувањето на новиот договор за фискалниот пакт е најавено за следниот самит на Унијата кон крајот на март годинава, а тој ќе стапи во силта откако ќе го ртификуваат најмалку 12 земји-потписнички.
Велика Британија одби да се приклучи кон новиот фискален пакт, но не се спротивстави на вклучувањето на некои општоевропски институции во спроведување на контрола на финансиската и буџетската дисциплина во евросзоната.
Официјален Лондон, ваквиот став го најави уште на претходниот Самит на ЕУ во декември, кога побара гаранции дека нема да биде загрозена британската сувереност во делот на буџетот и финансиите. На синоќешниот вонреден самит во Брисел, британскиот премиер Дејвид Камерон само ја потврди претходната позиција.
Овојпат, како што јави дописникот на МИА од Лондон, тој не го блокираше новото решение, кое предвидува контролата на спроведувањето на фискалната дисциплина во еврозоната да ја вршат Европската комисија и Европскиот суд на правдата, иако овие две институции дејствуваат во интерес на сите 27 земји-членки на ЕУ, а не само на оние од зоната на еврото.
Во изјава за британските медиуми Камерон рече дека официјален Лондон ќе следи внимателно што ќе се случува и ќе реагира веднаш доколку бидат загрозени британските интереси.
- Ние не сакаме да ја спречиме еврозоната да го направи она што е потребно за надминуивање на актуелната криза, но не сакаме ниту да им се наштети на нашите интереси, рече британскиот премиер, објаснувајќи дека Велика Британија се уште има резерви кон некои правни решенија во договорот за фискалниот пакт.
Освен Велика Британија, и Чешка реши да не се приклучи кон новиот фискален пакт, но оваа земја, која исто така не е во еврозоната, одбивањето го објасни со „уставни пречки“.
Одлуката на Лондон и Прага околку пактот, според францускиот претседател Никола Саркози, не значат дека ЕУ се движи кон создавање на „Европа на два брзини“.
- Седумнаесетте земји од еврозоната ќе продолжат самите да се справуваат со проблемите повразни со нивната валута. Но, тоа не значи дека ќе има неколку брзини и не значи дека некои земји ќе бидат оставени на страна. Тоа само значи дека ќе имаме различни степени на европска интеграција... и дека секој има право на избор, изјави Саркози по завршувањето на Самитот на ЕУ.
|
