01.02.2012, 10:38 Попоски во Вашингтон по поддршка за членство во НАТО
Попоски треба да се сретне со американскиот заменик државен секретар Вилијам Барнс и со претставници на Конгресот.
Македонија ги исполни сите критериуми за членство во НАТО, очекува поддршка од сите земји членки на Алијансата и смета оти се истрошени сите аргументи за блокирање на нејзиниот напредок на тој пат. Тоа е пораката што шефот на дипломатојата Никола Попоски ќе ја пренесе на средбите што ќе ги има денеска и утре во Вашингтон, каде што ќе учествува на Молитвениот појадок што го приредува претседателот на САД Барак Обама.
Попоски треба да се сретне со американскиот заменик државен секретар Вилијам Барнс и со претставници на Конгресот.
- Со САД имаме секогаш многу отворен и конструктивен дијалог. Сметам дека денес е недосмислен фактот оти сите сакаат да ја видат Македонија час поскоро во НАТО. Од тој аспект пораката која сакаме да ја упатиме во претстојниот период е дека Македонија навистина ги има исполнто сите критериуми кои се неопходни за членство и мислиме дека од тој аспект кредибилитетот на процесот на евроаталантска интеграција треба да се задржи со тоа што ќе ни се даде можност да седнеме на заедничката маса. Очекуваме поддршка од сите земји членки, вклучително и од нашиот јужен сосед. Мислиме дека аргументите навистина се истрошени за блокирање на напредокот на Република Македонија на овој пат, изјави Попоски пред заминувањето за САД.
Шефот на македонската дипломатија во Вашингтон ќе има обраќање и во Атлантскиот совет на тема „Македонија на патот кон НАТО: Чукајќи на отворена врата“. Пред претставници на дипломатскиот кор, на американските институции и на медиумите, во влијателниот тинк-тенк ќе бидат изложени очекувањата на Република Македонија во евроатлантската интеграција по објавувањето на пресудата на Судот во Хаг, а истовремено ќе биде направен и осврт на реформските активности на Македонија на патот кон членството во НАТО.
|
