01.02.2012, 15:18 Оштетен џипот на градоначалникот на Кавадарци
Александар Панов се сомнева дека некој се обидува да го заплаши, но дека ваквиот напад нема да го поколеба во неговото работење
Кавадарци - Искрешена шофершајбна, оштетена хауба, искршени ретровизори и стоп светла. Ова е штетата која што непознати лица му ја нанеле на возилото на кавадаречкиот градоначалник Александар Панов. Џипот „опел антара“, кој бил паркиран пред зградата каде што живее градоначалникот, според полициските сознанија, бил оштетен синоќа околу 2 часот.
Полицијата извршила увид и се трага по сторителите. Градоначалникот Панов раскажува дека околу два часот по полноќ слушнал тропање, но воопшто не се посомневал дека можеби некој го оштетува неговиот џип. Најверојатно оштетувањата се направени со голем камен, што можеше да се забележи на местото каде што беше паркиран џипот.
„Сакам да пратам јавен апел дека ваквите чинови нема да ме поколебаат во извршувањето на функцијата и носењето одлуки. Место на магарето мавале на самарот. Ако имав страв немаше да се кандидирам за градоначалник, бидејќи знам дека јавната функција носи и вакви работи. Лечењето на фрустрации на ваков начин не води никаде. Кој и да го направил ова му простувам, но нема да има овој чин влијание врз моите одлуки и ќе продолжам уште повеќе да ја извршувам мојата функција“, вели градоначалникот, кој не се сомнева дека случајот има политичка позадина.
„Се сомневам во една личност. Мислам дека ова е нарачано и е направено од повеќе извршители“, додава Панов и се надева дека крим техника ќе успее да дојде до сторителот или сторителите, а тие ќе го кажат нарачателот.(А.Д.)
|
