30.01.2012, 12:43 Британски „Дејли Мејл“ најпопуларно интернет издание
Интернет страницата на британскиот весник „Дејли Мејл“ е прогласена за најпопуларна во светот, објави порталот „BuzzFeed“, повикувајќи се на истражувањето на компанијата „comScore“.
Лондонскиот таблоид според посетеноста на својот сајт успешно го надмина американскиот весник „Њујорк Тајмс“.
Според податоците на „comScore“, сајтот на „Дејли Мејл“ во декември 2011 година го посетиле околу 45,3 милиони луѓе, а страницата на „Њујорк Тајмс“ 44,8 милони.
Главниот уредник на сајтот на британскиот весник Мартин Кларк изјави дека до зголемувње на бројот на посетители дошло благодарејќи главно на американскиот аудиториум.
Претставничката на „Њујорк Тајмс“, Ејлин Мерфи за „BuzzFeed“ изјави дека британскиот весник успеал да го надмине нејзиниот весник во рејтингот, благодарејќи на тоа што аналитичарите на „comScore“ ја гледале посетеноста само на еден сајт посветен на финансиите „This is Money“.
Мерфи нагласи дека вкупната посетеност на основниот сајт на „Њујорк Тајмс“ и нему припаѓачкиот „Бостон Глобал“ била поголема од посетеноста на „Дејли Мејл“. Таа, исто така, истакна дека „Њујорк Тајмс“ останува најголемо интернет издание во светот и им предложи на претставниците на „BuzzFeed“ едноставно да ја споредат посетеноста на насловната страницата на двата сајта.
Заедно со „Мејл онлајн“ и „Њујорк Тајмс“ меѓу петте најпосетени интернет весници се „УСА Тудеј, сајтовите на весниците „Трибун“ и „Гардијан“.
Сајтот на „Дејли Мејл“ во сегашната форма е промовиран пред три години. Основно внимание таблоидот посветува на вестите од шоу бизнисот и скандалите. Во својата печатена верзија „Дејли Мејл“ по популарност заостанува зад другиот британски таблоид „Сан“.
|
