01.02.2012, 15:03 Тодоров: Пристапот до здравствената установа да биде еднаков за сите граѓани
Пристапот до здравствената установа треба да биде еднаков за сите граѓани на Република Македонија без разлика на етничка припадност и вероисповед. Сите повици за дискриминација и бојкот на здравствените установи прават штета единствено на пациентите, рече министерот за здравство Никола Тодоров одговарајќи на новинарско прашање за повикот од градоначалникот на Струга Рамиз Мерко, жителите од Лабуништа да не одат на систематски прегледи и на вакцинации во Здравствениот дом во Вевчани.
Здравјето, посочи Тодоров, не познава ниту вера, ниту етничка припадност.
- Секој може да дава изјава и за неа секој си сноси консеквенци некогаш морални, некогаш политички, граѓански или кривични. Секој граѓанин има право, но и обрвска да се грижи за сопственото здравје и никој нема право да го спречува тоа да го направи, особено не кога во Македонија имаме толку екстензивен и раширен здравствен систем, додаде Тодоров одговарајќи на новинарско прашање на прес-конференција на која го најави новиот начин на издавање резултати од радиодијагностиката.
|
