01.02.2012, 11:00 Почина новинарката на „Дневник“ Натали Сотировска
По долго и тешко боледување, вчера почина нашата колешка Натали Сотировска, долгогодишна новинарка во дневниот весник „Дневник“. Натали имаше само 44 години, а беше еден од новинарите кои беа дел од првата постава кога весникот „Дневник“ застануваше на нозе и прв пат се појави на пазарот.
Целиот свој шеснаесетгодишен новинарски стаж Натали му го посвети на пишување текстови за правосудството и борбата против корупцијата, а во кариерата ја водеше желбата да се развива истражувачкото новинарство. Меѓу колегите важеше, пред се', за принципиелен новинар, препознатлива по текстовите, по својата објективност, податливост. Со еден збор, беше пример за сите.
За жал, не успеа да ја победи битката со болеста, која само ја направи похрабра, поиздржлива, што не го криеше, туку, напротив, се гордееше со тоа. Се радуваше на секој нов ден и таа позитивна енергија која се гледаше на нејзиното лице и нејзиниот изглед кој не' восхитуваше ни ја ширеше на сите. Зашто кога ќе ја сретнев на скалите додека се разминувавме одејќи на настани или кога ќе помислев на неа, Натали ми беше асоцијација за живот. И сега додека го пишувам ова, се сеќавам на нејзината насмевка која не и' се симнуваше од лицето. Постојано беше насмеана, иако сите знаевме дека длабоко во себе ги криеше сите маки и сите тажни моменти што ја повредиле во минатото.
Така и ја запознав, уште кога ги почнував своите први новинарски чекори. Беше повлечена, тивка, одмерена во зборовите, контактиравме само службено. Со нетрпение го очекував следниот број на весникот за кој работеше. Секогаш знаеше да изненади со нејзината аналитичност и начинот на кој им приоѓаше на работите - повеќе кажуваше кога пишуваше.
„Натали беше дел од првата екипа која го покрена весникот ’Дневник‘. Таа беше новинарка на која објективноста во пристапот кон сите теми и' беше на прво место. Никогаш не се поведуваше по некаков сензационалистички пристап, туку секогаш бараше да се држиме до аргументи и во текстовите да ги застапуваме ставовите што ќе ни помогнат како држава да добиеме подобар правен систем. Во тоа секогаш успеваше“, ја опишува Натали нејзиниот колега Бранко Ѓорѓевски, помошник на главниот и одговорен уредник во весникот „Дневник“. За Натали вели дека може да биде пример за другите новинари кои работат во сферата на правосудството.
Се радувавме со неа додека ја гледавме со колкава жар не и' се предава на болеста која полека, но сигурно ја совладуваше. Ни беше чест да ја имаме за колешка, пријател, познајник. Не' смрзна веста дека веќе ја нема, но ќе ја зачуваме во нашите срца и мисли. (Ж.Х.З.) |
