30.01.2012, 13:32 Ја убиле зашто три пати родила женско
Млада Авганистанка е убиена затоа што по трет пат родила девојче, пренесоа агенциите.
Триесетгодишната Стораи била задушена од својот сопруг и од свекрвата, кои биле разгневени од раѓањето на третата женска рожба.
Трагедијата се случила во едно отсечено село во округот Ханабад, во провинцијата Кундуз.
Портпаролот на полицијата открива дека жената била заплашувана од својот сопруг дека ќе биде убиена доколку роди уште едно девојче.
Полицијата тргаа по убиецот, а свекрвата на Стораи веќе е уапсена.
Минатата недела во соседната авганистанска провинција Баглан полицијата од слична судбина спаси малолетно девојче, откако нејзините свекор и свекрва ја држеле заклучена во тоалетот цели шест месеци како казна затоа што одбивала да стане проститутка.
Заштитниците на правата на човекот редовно изразуваат загриженост и предупредуваат за судбината на жените во Авганистан. Во 2010 година во извештајот на ОН беше посочено дека една третина од авганистанските жени се изложени на физичко и на психичко малтретирање, а 25 проценти стануваат жртви на сексуално насилство. (прес24)
|
