Бесими против спомениците

Министерот Фатмир Бесими не ја крие разочараноста што неговата Влада, наместо за инфраструктура, ги трошите парите од буџетот за изградба на споменици, е пораката од изјавата што ја дал за „Фајненшел тајмс“ во контекст на анализата на весникот за проектот „Скопје 2014“.

„Јас лично се согласувам со оние што упатуваат критика“, изјавил Бесими околу ставањето во втор план на патиштата и на училиштата во корист на проектот. „На земјата и' е потребна инфраструктура. Ако трошиме пари од буџетот, тоа треба да има поголеми повеќекратни ефекти“, порачал тој за „Фајненшел Тајмс“. Според анализата, иако оваа градежна еуфорија има одреден број поддржувачи, сепак, тие се малубројни. Речиси две третини од населението се противат на проектот „Скопје 2014“, главно, од финансиски причини, пишува весникот, повикувајќи се на анкетите на Американскиот национален демократски институт. Потоа, тој цитира и други критичари.

„Немаше консензус и јавна дебата“, изјавил амбасадорот Ерван Фуере. „Ние би сакале да видиме поголема консултација со јавноста за така голем, сеопфатен урбанистички план за обновување на главниот град, особено затоа што се вклучени јавни пари“.

Спомениците се чуден приоритет во време на затегнат буџет и зголемена сиромаштија, оценува весникот цитирајќи западен дипломат според кој сето ова се случува во време додека голем број училишта немаат санитарни јазли. Притоа се посочува уште еден ризик од страна на претставниците на САД и на ЕУ т.е. да се разгорат етничките тензии што сега се на најниско ниво од меѓуетничките судири во 2001 година. „Етничките Албанци, кои сочинуваат речиси четвртина од населението, ја прифатија македонската држава само во очекување на интеграцијата во НАТО и во ЕУ. Тие не се купуваат со национален идентитет спонзориран од државата. Националните херои на малцинските групи се додадени на програмата со споменици, но само како подоцнежна идеја“, пишува во анализата.

Не сите македонски патриоти, завршува „Фајненшел тајмс“, се чувствуваат приврзани кон Александар Велики. Љупчо Георгиевски, тврдокорен политичар кој се одвои од владејачката партија, вели: „Имаме добри 100 години историја за кои треба да разговараме“, почнувајќи од давањето отпор на Отоманската Империја. „Зошто мораме да тврдиме дека сме најстара н��ција во Европа?“ Но, Владимир Тодоровиќ, градоначалникот на Општина Центар, вели дека на Скопје му е потребна замена на „грдата или едноставна комунистичка архитектура“, која преовладуваше од земјотресот во 1963 година. (Н.Р.)