Адвокатска приправничка го преживеала нападот во „Биг фиш“

Девојката, наводно, преживеала, бидејќи еден од загинатите успеал да ја заштити од куршумите со своето тело

Приправничка во угледна скопска адвокатска канцеларија го преживеала трикратното крваво убиство во населбата Аеродром што ја шокираше јавноста. Според досегашните сознанија, таа седела на масата заедно со тројцата убиени во моментот кога уапсениот Тони Денковски стрелал во своите жртви. Претпоставките се дека девојката го преживеала крвавиот чин, бидејќи еден од загинатите успеал со своето тело да ја заштити од куршумите.

Трикратното убиство се случи во четвртокот вечерта во ресторанот „Биг фиш“, во трговскиот центар „13 Ноември“ во скопската населба Аеродром. Денковски, според сознанијата на полицијата, во еден момент влегол во ресторанот и со рафални истрели ги погодил велешанецот Јордан Јорданов, кој починал веднаш, како и Влатко Андреевски (26) и Владо Милошев (36), кои им подлегнаа на повредите во болница. МВР го лоцираше мотивот за убиството во нерасчистени должничко-доверителски односи меѓу убиецот и Јордан Јорданов, кој, наводно, бил цел на нападот.

Иако приведениот за трикратното убиство, Тони Денковски, се одлучи да молчи пред истражниот судија, се очекува натамошната судската истрага да фрли ново светло на настанот. Во истрагата, која се очекува да добие на интензитет во наредниве денови, едно лице веќе е заведено како очевидец и оштетен.

Иако никој моментално не сака отворено да говори за у��иствата, неофицијално се дознава дека критичната вечер на иста маса освен сега загинатите Милошев, Јорданов и Андреевски, била и една девојка. Според истите сознанија, станува збор за приправничка во една угледна скопска адвокатска канцеларија, која била сведок на настанот, односно била на масата во миговите кога Тони Денковски стрелал во своите жртви.

Претпоставките се дека девојката успеала да ја преживее стрелбата, бидејќи дел од куршумите завршиле во телото на еден од убиените, кој се наоѓал пред неа. Дали настанот навистина течел според ваквото сценарио, дополнително ќе треба да утврди истрагата, па оттука не треба да се исклучи и можноста од реконструкција на целиот настан.

За јавноста се' уште остана нејасно како се нашле тројцата убиени во исто друштво, особено што едниот од нив е вработен во Шестата управа на МВР, задолжен за обезбедување странски делегации, а другите двајца отпорано и' се познати на полицијата како припадници на „Франкфуртска мафија“, позната по трговија со дрога?!

Од МВР и натаму тврдат дека загинатиот припадник на полицијата имал чисто досие и дека никогаш не било практика да се води истрага против жртви, туку само против извршителите на убиствата. (Љ.С.)