Насловна

ЕДИТОРИЈАЛ

Прво кредит, па потоа може одмор

Соња Маџовска

Иако летната сезона е при крај, ако сакате на раат да лежите на плажа, без постојано да ви ѕвони некој непознат број, платете си ги обврските. Платете ги ратите за кредит, месечната уплата на картичките, сметките за комуналии, во спротивно некој дрзок оператор може да ви префрли во стилот „како тоа за на одмор имате пари, а немате доволно средства да ја платите ратата за кредит“.

За да не ви се случи ваква неумесна констатација да ве извади од кожа, плаќајте на време. Граѓаните ќе речат „зарем ние не сакаме да биде така, ама проблемот е што се' помалку стигнува платата за да се плати се' навреме“. А тоа особено се чувствува последниве две три години. Н��, тоа банките воопшто не ги интересира.

Кога е наплатата во прашање тие се бескрупулозни и тука нема дилема. Нивна главна обврска е парите што ги пласирале како кредити да си ги вратат. Нивното образложение за тоа е дека парите што ги даваат како заеми се всушност средства на граѓаните и на фирмите орочени во банката како депозити. За тоа плаќаат камати, но и пенали ако им се зголеми процентот на нефункционални кредити.

И дотука е се' во ред. Проблемот настанува кога операторот од банката или од центарот за повик со кој банката има договор, ќе ви се јави и дрско ќе ве праша кога планирате да ја платите ратата и зошто тоа не сте го сториле навреме. За нив нема почитување ниту на пристојно време за јавување, не ги интересира дали сте на работа, или имате важен состанок, ако сте на одмор уште помалку.

Но, најстрашното доаѓа кога нема да ве најдат на домашниот или мобилниот телефон, па почнува потера по вас кај соседите. Тука веќе срамот станува уште поголем. Од една страна немаш пари во моментот да платиш, од друга операторот ве потсетува на тоа два пати во денот, од трета страна и сосетката ве гледа попреку.

Овој непрофесионален однос од страна на оние што ве потсетуваат дека немате пари, и дека треба да ги најдете што е можно побрзо, и уште е расположен да се расправа со вас, целосно ја нарушува приватноста.

Дури и самите банкари реагираат на ваквиот однос на операторите. Тие велат дека и самите на своја кожа го почувствувале тоа. Реагирале кај надлежните, а на самиот јавувач му објасниле дека со таквиот непрофесионален однос кон клиентите можат да останат без работа. Банкарите велат дека им праќаат и правилници и обрасци на центрите за повик, како тоа се прави во светот.

Во европските земји има строго пропишани правила кога операторот може да ве побара, и што треба да ви каже. Тоа никако не смее да биде пред 8 часот наутро, или после 21 часот навечер. Ако кажете дека сте на работа, телефонскиот разговор веднаш треба да биде прекинат. Контакт со друго лице може да се оствари само за да ја дознаат вашата адреса, телефон, или каде работите, но никако не треба да биде споменато за што ве бараат. А тоа лице, од кое треба да добијат информација за вас, може да го побараат само еднаш, и толку.

И за разлика од светската практика, кај нас засега барем не се наплаќа телефонскиот повик за потсетување, ама затоа има многу стимулации кои се користат за да ве натераат редовно да палаќате. Најчесто има бонус поени, а може да добиете и пониска камата, поради редовно плаќање на обврските. За сето ова по се изгледа е крајно време да размислат и нашите банкари и да воведат вакви стимулации.